Martyn Williams yn barod ar gyfer ei 100fed cap

Cyhoeddwyd
ffynhonnell y llunHuw Evans picture agency
disgrifiad o’r llunMartyn Williams yn anelu at ei 100fed cap dros Gymru

Fe fydd Martyn Williams yn cynrychioli Cymru am y 100fed tro yn erbyn y Barbariaid ar Fehefin 2.

Daeth gyrfa'r chwaraewr 36 oed gyda'r Gleision i ben pan drechon nhw Caeredin.

Dywedodd y byddai'n ymddeol ar ddiwedd y tymor ac ar y pryd roedd cefnogwyr yn ofni mai cyfanswm ei gapiau fyddai 99.

"Roedd yn benderfyniad (i ddewis Williams) ar sail rygbi nid o ran sentiment," meddai hyfforddwr dros dro Cymru, Rob Howley.

Fydd y capten, Sam warburton, ddim yn wynebu'r Barbariaid wrth iddo wella o anaf ond mae'n gobeithio bod yn iach ar gyfer gêm agoriadol Cymru yn erbyn Awstralia ar Fehefin 9.

'Profiad'

"Dyw Sam ddim wedi chwarae llawer o rygbi ers gêm y Gamp Lawn yn erbyn Ffrainc yng Nghaerdydd fis Mawrth," meddai Howley.

"Rydym hefyd am roi cyfle i chwaraewyr newydd.

"Mae gan Martyn lot o brofiad ac un peth sydd gan y Barbariaid yw profiad."

Dywedodd ei fod yn "falch" o roi cyfle i Williams ennill ei 100fed cap.

Roedd wedi ymddeol o rygbi rhyngwladol wedi Cwpan y Byd 2007 cyn i Warren Gatland ei berswadio i ailchwarae.

Anafu

Dywedodd Howley y byddai Adam Shingler, Ken Owens a Rhys Webb yn wynebu'r Barbariaid.

Mae'r canolwyr Jamie Roberts, Jon Davies a Scott Williams wedi eu hanafu.

Dywedodd Howley y gallai George North symud i'r canol.

Fe fydd yn cyhoeddi'r garfan o 38 neu 39 enw dyddd Llun cyn i'r garfan gael ei chwtogi i 34 ar gyfer y daith i Awstralia.

Straeon perthnasol

Dolenni perthnasol ar y we

Dyw'r BBC ddim yn gyfrifol am gynnwys gwefannau allanol