Bangor yn cynnal Gŵyl Gerddoriaeth Electronig

Image copyright (C) British Broadcasting Corporation

Image caption Mae'r digwyddiad wedi cael ei drefnu gan Ysgol Gerdd Prifysgol Bangor

Mae cerddorion rhyngwladol yn chwarae offerynnau 'rhyfedd a gwahanol' yn ystod gŵyl gerddoriaeth electronig sy'n cael ei chynnal ym Mangor.

Bydd INTER/actions, symposiwm tri diwrnod sydd yn rhad ac am ddim i bawb, yn cael ei gynnal mewn amrywiaeth o leoliadau ym Mangor rhwng dydd Mawrth a dydd Iau.

Mae'r digwyddiad, sydd wedi cael ei drefnu gan Ysgol Gerdd Prifysgol Bangor, yn cynnwys cyngherddau, sesiynau arddangos gyda cherddorion yn chwarae offerynnau electronig anghyffredin yn ogystal ag amrywiaeth o arddangosfeydd cerdd ryngweithiol.

Yn ogystal â chynnal digwyddiadau yn y Brifysgol, bydd staff o'r Ysgol Gerdd yn gweithio gyda Dinas Sain Bangor ar gyfer y digwyddiad 'Pont Menai a Gwifrau Sain' lle fydd Jodie Rose, artist sain o Awstralia, yn gosod meicroffonau ar Bont Menai.

'Pontio categorïau gwahanol'

Dywedodd Dr Xenia Pestova, Pennaeth Perfformio o fewn yr Ysgol Gerdd: "Rydw i'n edrych ymlaen ac mae'r digwyddiad wedi tynnu llawer o sylw yn rhyngwladol.

"Mae pobl o bob cwr o'r byd yn dod yma i berfformio a dangos ei gwaith.

"Mae'r mathau o gelf a cherddoriaeth rydym yn rhaglennu yn pontio categorïau gwahanol iawn - celf fideo, celf amgylcheddol, dylunio offeryn digidol, gwaith addasiad ar y pryd, jazz / roc a pherfformiad cyfoes clasurol - a hyn i gyd yma ym Mangor.

"Rydym yn gobeithio croesawu gymaint o bobl o'r gymuned leol ac sydd bosib i ni gael rhannu rhywbeth gwahanol gyda nhw."

Mae INTER/actions wedi ei drefnu ar y cyd gydag Electroacwstig Cymru, Risk of Shock, grŵp ymchwil GEMINi a Dinas Sain Bangor.

Mae'r holl ddigwyddiadau am ddim ac yn agored i bawb.