Hanner Cymru yn gwylio'r Gamp Lawn

Wales celebrate the Grand Slam with the Six Nations trophy Image copyright Not Specified
Image caption Fe welodd miliwn o bobl y gêm rhwng Cymru a Ffrainc ar y teledu, gyda channoedd o filoedd yn fwy yn gwylio mewn tafarnau a chlybiau

Fe welodd bron hanner poblogaeth Cymru fuddugoliaeth y tîm rygbi cenedlaethol yn cipio'r Gamp Lawn ar y teledu, yn ôl ffigyrau'r BBC.

Fe wyliodd miliwn o bobl y gêm ar y BBC - y gynulleidfa uchaf yng Nghymru mewn dwy flynedd - ac fe welodd 400,000 arall yr uchafbwyntiau yn ddiweddarach y penwythnos hwnnw.

Dangosodd arolwg gan BBC Cymru bod 300,000 arall wedi gwylio'r gêm mewn tafarn neu glwb.

Dywedodd y BBC bod y ffigyrau yn dangos angerdd y Cymry at rygbi.

800,000

Ar gyfartaledd, fe wyliodd 800,000 o bobl gemau Cymru ym Mhencampwriaeth y Chwe Gwlad gyda'r gynulleidfa ar gyfer rhannau olaf bob un o bum gêm Cymru yr uchaf erioed am y bencampwriaeth.

Dangosodd arolwg gan gwmni Beaufort Research bod chwarter yr oedolion dan 35 oed yng Nghymru wedi gwylio Cymru'n ennill y Gamp Lawn am y trydydd tro ers 2005 mewn bar neu glwb, gyda dwywaith cymaint o ddynion na merched yn gwylio'r gêm mewn lle felly.

Ond mewn lleoedd eraill roedd y gynulleidfa yn hanner a hanner rhwng merched a dynion.

Dywedodd pennaeth marchnata, cyfathrebu a chynulleidfaoedd BBC Cymru, Richard Thomas:

"Rydym yn gwybod bod archwaeth y gynulleidfa am rygbi yng Nghymru yn enfawr, ond mae'r ffigyrau yma'n dangos pa mor angerddol y mae pobl Cymru am eu rygbi.

"Rydym yn falch o fod wedi medru darparu ymdriniaeth dreiddgar a thrylwyr o'r digwyddiad chwaraeon mawr hwn i gymaint o bobl ar draws Cymru."

Straeon perthnasol