Cyhuddo wedi i drên a fan wrthdaro

Cyhoeddwyd
Ffynhonnell y llun, Other
Disgrifiad o’r llun, Roedd y ddamwain ar groesfan Pikins ger Llanbrynmair

Mae dyn wedi cael ei gyhuddo o beryglu diogelwch ar y rheilffordd heb fwriad ac o yrru'n beryglus wedi gwrthdrawiad rhwng trên a fan.

Cafodd Daniel Bellis ei gludo i'r ysbyty gydag anafiadau i'w frest a'i wddf wedi'r ddamwain ar Chwefror 16.

Roedd y fan cwmni B D Atkins Dairy Engineers wyneb i waered ger y cledrau ar ôl y gwrthdrawiad ar Groesfan Pikins ger Llanbrynmair.

Trên Arriva Cymru 10.09am o Birmingham i Aberystwyth oedd yn teithio ar y rheilffordd.

Dywedodd llefarydd ar ran Heddlu Trafnidiaeth Prydain: "Gallaf gadarnhau fod Daniel Bellis, 35 oed o Groesoswallt, Sir Amwythig, wedi cael ei gyhuddo.

"Mae hyn mewn perthynas â gwrthdrawiad rhwng fan yr oedd yn ei gyrru â thrên ar groesfan Pikins ger Llanbrynmawr, Powys ..."

Mae disgwyl iddo fod yn Llys Ynadon y Trallwng ar Fawrth 20.

Straeon perthnasol

Dolenni perthnasol ar y we

Dyw'r BBC ddim yn gyfrifol am gynnwys gwefannau allanol