Cwmni o America am greu hyd at 50 o swyddi yng Nghaerdydd

Cyhoeddwyd
Ffynhonnell y llun, (C) British Broadcasting Corporation
Disgrifiad o’r llun,
Cwmni: 'Digon o weithwyr proffesiynol' yn yr ardal

Mae cwmni o America yn gobeithio creu hyd at 50 o swyddi wrth ddewis Caerdydd fel eu lleoliad cyntaf yn Ewrop.

Cynnig gwasanaethau i gwmnïau yswiriant mae DRIAS Transit ddewisodd y brifddinas am fod "digon o weithwyr proffesiynol".

Fe fydd eu canolfan ym Mharc Busnes Porth Celtaidd Bae Caerdydd.

Mae Edwina Hart, Gweinidog Busnes Llywodraeth Cymru, wedi croesawu'r cynllun gafodd £162,000 oddi wrth Gronfa Hwb Economaidd y llywodraeth.

"O bosib hwn yw buddsoddiad cynta cwmni o America yng Nghymru ers mwy na phum mlynedd," meddai.

'Enw da'

"Mae DRIAS yn cael ei gydnabod yn America fel y prif ddarparwr gweinyddol ar gyfer cwmnïau yswiriant.

"Ac mae'r penderfyniad i leoli eu canolfan gyntaf yn Ewrop yng Nghaerdydd yn adlewyrchu enw da'r ardal o ran gwasanaethau ariannol a phroffesiynol."

Y llynedd cyhoeddwyd y dylid creu parthau penodol ar gyfer y math hwn o wasanaethau a Chaerdydd yw'r unig ddinas yn y Deyrnas Gyfunol â pharth penodol.

'Lleoliad gwych'

Ar y cychwyn, fe fydd y cwmni yn creu 30 o swyddi ond o fewn dwy flynedd y gobaith yw ehangu i 50 o swyddi.

"Mae Caerdydd yn lleoliad gwych ar gyfer ein busnes Ewropeaidd," meddai llywydd y cwmni, Dick Votel.

"Fe wnaethon ni ystyried sawl gwlad ar draws Ewrop. Rydym yn ddiolchgar am gefnogaeth Llywodraeth Cymru."

Mae'r pencadlys yn Minneapolis, Minnesota.

Straeon perthnasol

Dolenni perthnasol ar y we

Dyw'r BBC ddim yn gyfrifol am gynnwys gwefannau allanol