Dizzee am ddychwelyd i Wakestock

Dizzee Rascal Image copyright (C) British Broadcasting Corporation
Image caption Roedd yn dywydd gwlyb iawn pan ddaeth Dizzee i'r ŵyl yn 2009

Bydd Dizzee Rascal a'r canwr Calvin Harris yn dychwelyd i ŵyl Wakestock eleni.

Mae'n sicr bydd y rapiwr o Lundain yn falch y bydd y prif lwyfan dan do y tro yma ar ôl iddo berfformio yn y mwd a'r glaw yn 2009.

Dywedodd un o'r trefnwyr, Bex Tappin: "Mae Dizzee yn ffefryn i Wakestock ar ôl dod i'n gweld ni yn 2009 ac yn ogystal â bod yn ddyn gwych, fe lwyddodd i gyffroi'r dorf gyda chaneuon fel Bonkers a Dance Wiv Me."

Ychwanegodd Ms Tappin bod set Calvin Harris yn "brofiad i'w fwynhau" ac roedd hi'n sicr y byddai'r Albanwr yn "Dechrau'r parti yn 2012.

Mae'r trefnwyr hefyd wedi cyhoeddi y bydd Ed Sheeran, sydd wedi ei enwebu am bedair gwobr Brit, yn chwarae ar y prif lwyfan tro yma ar ôl ymddangos ar lwyfan llai'r llynedd.

Gwyntoedd

Cynhelir yr ŵyl, sydd yn ei 13eg blwyddyn, rhwng 6 a 8 Gorffennaf ar gaeau ym Mhenrhos, rhwng Pwllheli ag Abersoch.

Oherwydd trafferthion gyda gwyntoedd cryfion, mae'r trefnwyr eto wedi penderfynu cynnal y digwyddiad mewn tair pabell ar y safle.

Maent hefyd wedi cyhoeddi y byddant yn parhau i roi cyfle i fandiau lleol fod yn rhan o'r ŵyl.

Bydd y gystadleuaeth tonfyrddio rhyngwladol yn parhau i ddigwydd ym Mhwllheli. Mae'r trefnwyr yn dweud y byddant yn cyhoeddi'r cystadleuwyr, yn ogystal â rhagor o berfformwyr, yn y wythnosau i ddod.

Cysylltiadau Rhyngrwyd

Dyw'r BBC ddim yn gyfrifol am safleoedd rhyngrwyd allanol.