Gwiwerod coch: Pryder am dacsidermwyr

Cyhoeddwyd
Ffynhonnell y llun, Other
Disgrifiad o’r llun,
Dywedodd yr ymddiriedolaeth nad oedd cyrff gwiwerod coch yn cael eu rhoi iddyn nhw ar gyfer ymchwil

Mae cadwriaethwyr gyda chynllun i adfer gwiwerod coch i Ynys Môn yn poeni bod anifeiliaid sy'n cael eu lladd ar y ffordd yn cael eu cludo at dacsidermwyr.

Dywed Ymddiriedolaeth Wiwerod Coch Cymru eu bod am gael y cyrff am fod eu hangen ar gyfer gwaith ymchwil pwysig.

Yn ôl Dr Craig Shuttleworth o'r Ymddiriedolaeth, mae profion yn cael eu cynnal ar y cyrff fel modd o chwilio am glefydau.

Amcangyfrif y cynllun yw bod rhwng 400 a 500 o wiwerod coch yn byw ar Ynys Môn ar hyn o bryd.

"Rydym yn credu bod pobl yn codi wiwerod coch oddi ar y ffyrdd heb ddweud wrthym," meddai Dr Shuttleworth.

"Yn y gorffennol, rydym wedi gweld achosion o wiwerod yn cael eu cludo at dacsidermwyr, ac mae tri neu bedwar achos wedi bod yn ddiweddar o wirfoddolwyr yn mynd i safle ar ôl clywed adroddiad am weddillion, ond yna'n clywed wedi cyrraedd fod rhywun arall wedi mynd â nhw."

'Gwerth gwirioneddol'

Ychwanegodd ei bod yn bwysig i bob corff gael ei yrru am sgrinio ar gyfer feirysau o bob math.

"Mae hyn o werth gwirioneddol i ni fel prosiect," meddai.

Dywedodd Dr Shuttleworth fod yna farchnad ar gyfer anifeiliaid wedi eu stwffio, ond gan fod y wiwer goch yn rywogaeth sy'n cael ei amddiffyn gan y gyfraith, fe fyddai'n disgwyl i dacsidermwyr ofyn nifer o gwestiynau.

Mae'r cynllun hefyd angen gwybod lle mae'r anifeiliaid yn cael eu lladd, gan fod arian ar gael weithiau i godi pontydd i gynorthwyo wiwerod i groesi ffyrdd.

Daeth yr apêl o fewn wythnos i gyhoeddi cynllun cyfyngedig i ddifa'r wiwer lwyd yng Ngwynedd.

Dywedodd Dr Shuttleworth bod y wiwer goch wedi teithio o Ynys Môn i'r tir mawr, ac er mwyn hybu niferoedd bydd nifer o drapiau'n cael eu gosod rhwng Bangor a'r Felinheli, ac hefyd yn Nyffryn Ogwen.

Straeon perthnasol

Dolenni perthnasol ar y we

Dyw'r BBC ddim yn gyfrifol am gynnwys gwefannau allanol