Helpu elusen drwy gadw'n heini

Ben Nevis Image copyright (C) British Broadcasting Corporation
Image caption Ben Nevis yw'r ucha' o'r tri mynydd

Mae elusen Canser y Fron yn gobeithio y bydd nifer yn gwneud adduned Blwyddyn Newydd drwy wisgo'r esgidiau cerdded a chyflawni Her y Tri Copa.

O fewn 24 awr mae miloedd o bobl yn ceisio cyrraedd copa'r mynydd ucha' yng Nghymru, Lloegr a'r Alban.

Caiff Her y Tri Copa ei chyfri fel un o'r caletaf yn y DU.

Ond mae'r elusen yn gobeithio y bydd pobl yn ystyried gwneud hyn at achos da.

Fe fydd y rhai sy'n cymryd rhan yn cerdded tua 24 milltir, yn dringo dros 10,00 troedfedd o fewn 24 awr.

Mae'n her ac yn waith tîm i gyrraedd copa'r Wyddfa, Ben Nevis a Scafell Pike.

Er mwyn cymryd rhan yn y ras ym mis Gorffennaf mae angen cofrestru cyn mis Ebrill.

"Os ydach chi'n chwilio am her, yn chwilio am ffordd o gadw'n heini neu golli pwysau yn 2012, gall yr her yma fod yn ddelfrydol," meddai Kelly Walton o'r elusen.

"Nid yn unig y cewch chi'r cyfle i wneud rhywbeth arbennig ond fe fyddwch chi'n gwneud hynny drwy godi arian allweddol ar gyfer ymchwil i ganser y fron."

Cysylltiadau Rhyngrwyd

Dyw'r BBC ddim yn gyfrifol am safleoedd rhyngrwyd allanol.