BBC Cymru Fyw

Y Gleision am i Shaun Edwards yn ymuno â nhw

Published
image copyrightPA
image captionDaeth y cytundeb gyda Chymru i ben ar ddiwedd Cwpan Rygbi'r Byd

Wedi i gytundeb Shaun Edwards ddod i ben gyda thîm Cymru a Wasps mae 'na gryn drafod beth fydd yn ei wneud nesa.

Mae'r Gleision wedi awgrymu bod 'na le iddo gyda'r rhanbarth.

Yn ôl Peter Thomas, y cadeirydd, mae ganddyn nhw ddiddordeb mawr mewn arwyddo Edwards fel hyfforddwr amddiffyn rhan amser i weithio ochr yn ochr efo Gareth Baber a Justin Burnell.

Fe fyddai hynny yn golygu dwy neu dair sesiwn ymarfer bob wythnos ac ar ddiwrnod gêm.

Llesol

Mae Mr Thomas eisoes wedi siarad gydag Undeb Rygbi Cymru i weld a oes modd trefnu rhywbeth ar y cyd.

Rhwng Pencampwriaeth y Chwe Gwlad a gemau'r haf a hydref, meddai, tua phedwar mis o waith y flwyddyn sydd gan hyfforddwyr y tîm cenedlaethol.

Dywedodd y dylai pob hyfforddwr gael eu clustnodi ar gyfer y rhanbarthau am weddill y flwyddyn ac y byddai hyn yn llesol i'r rhanbarthau a'r hyfforddwyr.

Ac fe fyddai'n "cryfhau'r cysylltiau gyda'r tîm cenedlaethol".

Er iddo ofyn i'r undeb drafod y mater o ddifri, yn y pen draw, penderfyniad i fwrdd rheoli'r Gleision fydd penodi Edwards.

Fe fyddan nhw'n cyfarfod ddiwedd mis Tachwedd ac mae Shaun Edwards yn eitem ar yr agenda.