Dadorchuddio cofeb rhyfel

Cyhoeddwyd
Ffynhonnell y llun, Other
Disgrifiad o’r llun,
Mae yna ddwy gofeb rhyfel eisoes ym Mharc Ynysangharad

Mae dwy wal goffa wedi cael eu dadorchuddio ym Mhontypridd ddydd Gwener er cof am y rhai a fu farw mewn rhyfeloedd ers 1914.

Ar y ddwy wal ym Mharc Ynysangharad mae cyfanswm o 1,319 o enwau.

Dywedodd llefarydd fod yr enwau wedi eu casglu drwy ddefnyddio cofnodion swyddogol a gwybodaeth leol.

Bu farw 821 yn y Rhyfel Byd cyntaf a 491 yn yr Ail Ryfel Byd.

'Emosiynol'

Bu farw pedwar yn ystod Rhyfel y Falklands, ac un yr un yn y gwrthdaro neu ryfel ym Mhalestina, Korea a Suez.

Cyn y dadorchuddio dywedodd y Cynghorydd Sylvia Jones, Maer Rhondda Cynon Taf: "Bydd y seremoni yn un emosiynol wrth i ni roi teyrnged i'r rhai dewr fu farw mewn dau ryfel byd a rhyfeloedd eraill."

Mae'r cyngor sir wedi bod yn cydweithio gyda Chyngor Tre Pontypridd a'r Lleng Brydeinig wrth lunio'r rhestr enwau a hefyd wrth gasglu arian ar gyfer y cofebion.

"Mae'n bwysig nad yw'r rhai wnaeth aberthu cymaint yn cael eu hanghofio a bydd y gofeb yn helpu atgyfnerthu statws Parc Ynysangharad," meddai'r cynghorydd.