Tlws aredig y byd: Torri cwys newydd

Cystadleuaeth Aredig Ewrop 2008 Image copyright Other
Image caption Mae'r tractorau a ddefnyddir yn y bencampwriaeth yn dyddio o'r 1920au tan y 1950au

Am y tro cyntaf erioed mae pencampwriaeth aredig y byd i hen dractorau yn cael ei chynnal yng Nghymru'r penwythnos hwn.

Mae disgwyl cynrychiolaeth o wledydd fel Seland Newydd, Ffrainc a'r Iseldiroedd yn y gystadleuaeth sy'n cael ei chynnal yng Nghaeriw yn Sir Benfro.

Mae'r tractorau a ddefnyddir yn y bencampwriaeth yn dyddio o'r 1920au tan y 1950au.

Dywedodd un o drefnwyr y gystadleuaeth, Gordon Harries, 68 oed mai'r nos yw "sicrhau eich bod chi'n troi'r tir mewn llinell syth".

Torf o 70,000

Mr Harries, sy'n ffermwr sydd wedi ymddeol o gyffiniau Dinbych-y-pysgod, yw pencampwr y pum gwlad eleni wedi iddo guro cystadleuwyr o Gymru, Lloegr, yr Alban, Iwerddon a Gogledd Iwerddon.

"Mae'n rhaid i chi fod yn bwyllog wrth aredig gan sicrhau nad oes unrhyw wair neu chwyn ar ôl wedi ichi aredig y tir."

Cafodd pencampwriaeth Aredig y Byd ei chynnal yn Sweden eleni ond mae Mr Harries yn tyngu bod aredig gan ddefnyddio hen dractorau yn fwy o hwyl.

"Mae defnyddio hen dractorau yn llawer mwy anodd am fod rhaid i bopeth sy'n cael ei wneud yn berthynol i'[r llaw."

Yr unig Gymro i ennill Pencampwriaeth Aredig y Byd yw Leslie Goodwin o'r Gelli Gandryll.

Gwyliodd torf o 70,000 o bobl Mr Goodwin yn cipio'r bencampwriaeth yn yr Almaen ar 4 Hydref 1958 pan oedd e'n 28 oed.

Cysylltiadau Rhyngrwyd

Dyw'r BBC ddim yn gyfrifol am safleoedd rhyngrwyd allanol.