Aonta Warsaw

Chaidh Aonta Warsaw a stèidheachadh ann an 1955. B' e caidreachas armailteach a bh' ann de dhùthchannan comannach. Bha e stèidhichte air beachd tèarainteachd cho-chaidreachail – nan deigheadh ionnsaigh a thoirt air aon stàit a bha na ball de Aonta Warsaw, chuidicheadh na stàitean eile a bha nam buill le bhith ga dìon.

Cò na dùthchannan a bha nam buill?

• B' iad na dùthchannan a bha nam buill bho thùs an USSR, a' Ghearmailt an Ear, A' Phòlainn, An Ungair, Seiceoslobagia, Romàinia, Bulgàiria agus Albàinia.
• Cha robh Iùgoslabhia na ball ged a b' e dùthaich chomannach a bh' innte.

Carson a chaidh Aonta Warsaw a stèidheachadh?

Faodar seo fhaicinn mar nì a thachair air sgàth 's gun deach NATO a stèidheachadh ann an 1949, agus seach gun robh buidheann dhùthchannan an ear air an cuartachadh le dùthchannan NATO.

Fhuair a' Ghearmailt an Iar cead a bhith na phàirt de NATO ann an 1955. Bha cead aice cuideachd arm agus feachd-adhair a bhith aice. Bha an USSR a' faicinn sin mar chunnart a dh'fhaodadh a bhith a' ciallachadh gum biodh a' Ghearmailt làidir a-rithist agus na cunnart.

B' ann aig an USSR a bu mhotha a bha de smachd air Aonta Warsaw. Bha sin a' ciallachadh gum faodadh iad am poileasaidh cèin aca a sparradh air na dùthchannan eile air an taobh an ear.

Bho 1955 bha an Roinn Eòrpa air a roinn na dà bhuidheann armaichte - bha loidhnichean-aghaidh a' Chogaidh Fhuair air an stèidheachadh.