Adhbharan nach b' urrainn dha na SA buaidh fhaighinn air na Bhietcong

Innleachdan neo-èifeachdach nan SA

Cha b' urrainn dha na SA na Bhietcong (duine sam bith à Bhietnam a bha a' toirt taic do chomannachd agus dhan cheann a Tuath) a chur fodha. Tha iomadh adhbhar airson sin.

Innleachdan armailteach Ameireaganach

Bha dòigh-obrach nan Ameireaganach uabhasach borb agus thionndaidh muinntir Bhietnam nan aghaidh.

Bailtean ro-innleachd

Gus nach faigheadh na Bhietcong air falach ann am bailtean sa cheann a deas, chaidh luchd-tuatha Bhietnam a Deas a chur às na bailtean aca agus an gluasad gu 'bailtean ro-innleachd'. Bha uèir bhiorach timcheall nam bailtean sin agus bha iad fo smachd nan Ameireaganach.

Opairèisean Rolling Thunder (1965-68)

Bha na SA a' bomadh mòran thargaidean gnìomhachais ann a' Bhietnam a Tuath gus stad a chur air feachdan agus buill-airm bho dhol dhan cheann a Deas. Glè thric cha robh na bomaichean a' bualadh nan targaidean agus bhiodh iad a' bualadh ann an sgoiltean is ann an ospadail.

Buill-airm cheimigeach

Chleachd na SA buill-airm cheimigeach, Napalm (peatrail air a dhèanamh tiugh) agus Agent Orange (puinnsean luibhean uabhasach làidir). Bha seo air a chleachdadh airson duilleach a mharbhadh san fhàsach agus air Slighe Ho Chi Minh, slighe bathair nam Bhietcong. Bha an Napalm a' steigeadh ri daoine agus ag adhbharachadh leòintean uabhasach. Chuir Agent Orange às do thuathanasan iomadh neach neoichiontach, do bhàrr agus do bheathaichean.

A' frasadh Agent Orange thairis air Bhietnam

Miseanan lorg is sgrios

Dh'fheuch na SA ri cur às dha na Bhietcong ann am bailtean a' chinn a Deas. Bhiodh iad a' tighinn a-steach ann a' heileacoptair agus a' marbhadh dhaoine a bha iad a' smaoineachadh a bha de mhuinntir a' Bhietcong. Ann an 1968, chrìochnaich misean baile My Lai nuair a chaidh boireannaich, clann agus mòran dhaoine neoichiontach eile a mharbhadh.