Effaith newid hinsawdd

Effaith ar y byd

Bydd effeithiau posibl newid hinsawdd yn amrywio’n fawr ar hyd a lled y byd. Y bobl sy’n byw yn y gwledydd lleiaf datblygedig fydd yn cael eu taro waethaf.

Gallai’r effeithiau negyddol gynnwys:

  • lefelau’r môr yn codi o ganlyniad i rew/iâ’n meirioli ac ehangu thermol (mae biliwn o bobl yn byw mewn ardaloedd arfordirol)
  • newid mewn patrymau glawiad, yn achosi diffeithdiro mewn rhai ardaloedd a mwy o lifogydd mewn ardaloedd eraill
  • tywydd eithafol yn digwydd yn amlach, gan gynnwys tonnau gwres, sychder a glawiad trwm, a byddai stormydd trofannol hefyd yn gryfach ac yn digwydd yn amlach
  • rhai rhywogaethau’n darfod oherwydd newid mewn patrymau tymheredd
  • lledaenu afiechydon fel malaria (gallai 280 miliwn yn rhagor o bobl gael eu heffeithio)
  • newid ym mhatrymau amaethyddiaeth a chynnyrch cnydau
  • diffeithdiro neu lifogydd arfordirol yn achosi i bobl fudo, a gallai hynny arwain at wrthdaro gwleidyddol, a hyd yn oed at wrthdaro milwrol
  • gallai canolfannau sgïo mewn lleoedd fel yr Alpau gau oherwydd prinder eira

Gallai’r effeithiau cadarnhaol gynnwys:

  • gallai rhai anifeiliaid a phlanhigion elwa a ffynnu mewn hinsawdd sy’n newid
  • byddai llwybrau môr newydd, fel llwybr y gogledd-orllewin, ar gael
  • rhagor o adnoddau, fel olew, ar gael mewn lleoedd fel Alasga a Siberia pan fydd y rhew/iâ yn meirioli
  • defnydd o egni yn lleihau gan fod yr hinsawdd yn gynhesach
  • tymor tyfu hirach yn arwain at fwy o gynnyrch yn yr ardaloedd ffermio presennol
  • gallai rhanbarthau sydd dan rew/iâ, fel Canada a Siberia, dyfu cnydau
  • byddai cyrchfannau newydd ar gael i ymwelwyr

Effaith ar y DU

Yn y DU, gallai newid hinsawdd gael llawer o effeithiau negyddol a chadarnhaol.

Effeithiau negyddol newid hinsawdd yn y DU

  • Gallai canolfannau sgïo yn yr Alban gau oherwydd prinder eira.
  • Gallai rhywogaethau o blanhigion yr Arctig yn yr Alban ddarfod.
  • Cost adeiladu amddiffynfeydd morol yn codi – wrth i berygl llifogydd gynyddu ac i lefelau’r môr ddal i godi.
  • Lefel y môr yn codi ac yn llifo dros ardaloedd isel, yn enwedig yn ne-ddwyrain Lloegr – byddai tir amaethyddol gwerthfawr fel y Ffens yn cael ei golli.
  • Bydd digwyddiadau tywydd eithafol fel gwyntoedd tymhestlog a stormydd yn fwy cyffredin.
  • Efallai y byddai tymereddau cynhesach yn ei gwneud hi’n haws i glefydau a phlâu oroesi gaeafau mwynach.
  • Mwy o alw am ddŵr mewn hafau poethach yn rhoi pwysau ar gyflenwadau dŵr, yn enwedig yn ne-ddwyrain y DU.

Effeithiau cadarnhaol newid hinsawdd yn y DU

  • Byddai rhai rhywogaethau o blanhigion ac anifeiliaid yn ffynnu, a byddent yn gallu tyfu a goroesi ymhellach i’r gogledd ac ar dir uwch.
  • Twf yn niwydiant ymwelwyr y DU, yn enwedig canolfannau glan môr, â hafau cynhesach, sychach.
  • Byddai tymereddau cynhesach yn lleihau costau gwresogi yn y gaeaf.
  • Gallai tymereddau cynhesach arwain at ffyrdd iachach o fyw allan yn yr awyr agored.
  • Gallai tymereddau uwch drwy’r flwyddyn a thymhorau tyfu hirach olygu y gallai cnydau newydd fel orennau, grawnwin ac eirin gwlanog ffynnu yn y DU.