Bomadh

B' e dùthaich le tòrr gnìomhachas trom a bh' ann am Breatainn agus bhiodh i a' dèanamh mòran dhen stuth air an robh feum airson a' chogaidh an aghaidh na Gearmailt anns na factaraidhean, na mèinnean agus na gàrraidhean-iarainn.

Bha na Gearmailtich ag amas air comas Bhreatainn air dèanamh a' bhathair agus nan stuthan sin a sgrios.

Bha an Luftwaffe Gearmailteach ga chleachdadh airson bailtean gnìomhachais ann am Breatainn a bhomadh, leithid Lunnainn, Dùn Èideann, Glaschu, Obar Dheathain, Liverpool, Manchester agus Sheffield. Bha am bomadh gu h-àraidh dona ann an 1940-41. B' e am Blitz a bh' aig pàipearan-naidheachd Bhreatainn air a' bhomadh sin.

Lunnainn aig àm a' Bhlitz
Lunnainn ann an 1940, aig àm a' Bhlitz

Bhuail bomaichean na Gearmailt ann an sgìrean còmhnaidh agus air dachaighean dhaoine. Thug seo air an riaghaltas rudeigin a dhèanamh - chaidh daoine am brosnachadh gus Fasgadh Anderson a thogail sa ghàrradh aca. Chaidh àitichean-fasgaidh mòra a thogail anns na bailtean airson dìon a thoirt do dhaoine aig nach robh gàrradh. Bha 'dubhadh' ann an dèidh beul na h-oidhche.

A' gabhail fasgadh bhon Bhlitz ann an stèisean rèile fo thalamh Bounds Green, Lunnainn
A' gabhail fasgadh bhon Bhlitz ann an stèisean rèile fo thalamh Bounds Green, Lunnainn

Thug am bomadh buaidh air a' chomann-sòisealta gu lèir. Bha an t-obair-chlas, am meadhan-chlas agus am bàrr-chlas san aon chunnart.

Bha am bomadh na adhbhar air beachdan atharrachadh. Bha na daoine cumanta a' cuideachadh a chèile a' togail fhasgaidhean agus bhiodh iad a' coimhead ach an robh teaghlaichean a' cur feum air cuideachadh an dèidh ionnsaigh. Thug e air adhart spiorad agus faireachdainn coimhearsnachd ann am Breatainn agus bha a h-uile duine a' cuideachadh a chèile. Lean an spiorad sin an dèidh a' chogaidh, agus mar thoradh air an sin, chaidh laghan ùra a chur an gnìomh.