Ўзбекистон: 'Севишганлар куни'да Бобурхонлик, ким нима дейди?

Ўзбекистонда "Севишганлар куни"га муносабат бир хил эмас...

Ўзбекистондан олинган хабарларга кўра, 14 феврал - Авлиё Валентин ёки ёшлар орасида "Севишганлар куни", дея ном қозонган сана муносабати билан ўтказиладиган концерт ва дастурлар бекор қилинган.

Ушбу кун Ўзбекистонда расман тақиқланмаган бўлса-да, расмий даражада байрам ҳам қилинмаган.

Аммо ёшларнинг ушбу кунни кенг нишонлаши урфга кириб бораётгани айтиларди.

Расмийлар 14 февралда Заҳириддин Муҳаммад Бобурнинг туғилган куни кенг нишонланишини билдиришган.

Ғарбда кенг урф бўлган ва тижорийлашиб кетган Авлиё Валентин куни сўнгги йиллари Осиёга ҳам кириб кела бошлаган.

Аммо кўплаб Осиё ва мусулмонлар ўлкалари, хусусан, Ўзбекистонда ҳам бу каби саёз саналар миллий қадриятларга дарз етказади, деган хавотирлар кучли.

Би-би-сининг Ўзбекистондаги суҳбатдошлари севишганлар кунининг нишонланишига турли фикрлар билдиришди.

Ҳар кимнинг шахсий иши

Айримлар қандай байрамни нишонлаш ҳар кимнинг шахсий иши дейишса, яна бошқалар бундай байрам ўзбек урф-одатларимизга зид эканлигини таъкидлашди.

Тошкентлик ўзини Абдували, деб таништирган зиёли суҳбатдошимиз 14 феврал куни "Севишганлар куни"га бағишлаб ўтказиладиган концертлар бекор қилингани айни муддоа бўлганини айтади.

“Жуда ҳам тўппа-тўғри қилишган. 14 феврал бу бобоколонимиз Бобурнинг туғилган куни. Нима учун биз келиб чиқиши бетайин бўлган байрамни нишонлашимиз керак. Умуман бизнинг менталитетимиз, урф-одатларимиз ва маданиятимизга тўғри келмайдиган нарса. Нима учун алоҳида севишганлар кунини қилиш керак. Одам бирортасини севса, йил бўйи севаверади, бир кунни байрам қилиш керак эмас”, - дейди Абдували.

Суҳбатдошимиз ушбу байрамнинг Ўзбекистонда оммалашишига хонанда Райхоннинг улуши катта бўлганини ва 14 феврал куни унинг концертини бекор қилиш тўғри қарор бўлганини урғулайди.

Шоу ва маданият оламидаги янгиликларни ёзувчи Shov-shuv.uz веб саҳифаси муаллифи Жасур Ҳамроев бирор байрамни нишонлаш инсонларнинг шахсий иши эканлиги ва бунга тақиқ қўйиш дуруст эмаслигини айтади.

“Миллатчилик қилиш керак эмас. Бу бир миллатнинг байрами ёки бу динга тегишли деган нарсалар бўлгинчилик тушунчаларига олиб келади. Айтмоқчи бўлганим шуки, ким хоҳласа байрам қилсин, ким хоҳласа уйида ўтирсин, истаган одам чиқиб севгилисини табрикласин”, - дейди Жасур Ҳамроев.

Райхоннинг концерти

14 феврал - ҳар йили хонанда Райхоннинг берадиган концерти билан рамзий боғланиб қолган

Шоу олами журналисти 14 феврал - ҳар йили хонанда Райхоннинг берадиган концерти билан рамзий боғланиб қолгани, севишганлар айнан шу куни концертга тушиб дам олишганини айтади. У нима учун бу нарсага айнан бугун келиб тақиқ қўйилаётганини тушунмаслигини билдирди...

“Кулгим келгани, нимага 10 йилдан бери концерт бераётган хонанда кимнингдир эсига тушиб қолгани ғалати нарса”, - дейди Жасур Ҳамроев.

Тошкентдаги коллежлардан бирида таҳсил олувчи талаба 14 феврални нишонлаш ўқув юртларида учраб туришини айтди.

“Бир-иккита бўлади, аммо кўпчилик эмас. Бир бирига совға беради. Йигит қизга, қиз йигитга совға беради. Оддий эсдалик совғалари берилади”, - дейди коллеж талабаси.

“7х7” газетаси “Сирдош” рукнининг муаллифи Раъно Маҳмудова вояга етган қизнинг онаси сифатида "Севишганлар куни"нинг ўзбек урф-одатларига ёт ва зарарли эканлигини таъкидлайди. Раъно опа шу кун муносабати билан Тошкент шаҳридаги газета мухлисларидан бири бошидан кечирган ҳикояни айтиб беради.

“Икки ёшнинг бирга бўлишига икки томон келишиб қўйган. Севишганлар кунидан икки кун ўтганидан сўнг, қиз йигитнинг онасига йиғлаб телефон қилиб дардини айтади. “Мен сизнинг ўғлингизга турмушга чиқмайман. Сабаби - севишганлар кунида келиб мени табрикламади ва ҳамкасбларим олдида шарманда қилди”, - дейди. Шу сабабдан оила тузилмай қолган”, - дейди Раъно Маҳмудова.

Буюк шоир туғилган сана

Ўзбекистон 14 феврал куни буюк шоир Заҳириддин Муҳаммад Бобурнинг туғилган кунини кенг байрам қилмоқчи

14 феврал куни Заҳириддин Муҳаммад Бобурнинг туғилган кунини кенг миқёсда нишонланиши маълум бўлган.

Хонанда Райхоннинг концерти бўлиб ўтиши керак бўлган “Истиқлол” саройида ушбу кунга бағишлаб кеча ўтказилиши режалаштирилган.

Шоу олами журналисти Жасур Ҳамроев буюк шоирнинг туғилган куни бу тарзда нишонланмаслиги кераклигини айтади.

"Интеллектуал салоҳият билан кўнгилочар кунларни солиштириш умуман керак эмас. Шундоқ ҳам бобоколонимизга бўлган меҳр-муҳаббатимиз қалбимизда жо, уни ҳеч ким суғуриб ололмайди. Бу таваллуд куни катта байрам қилиб нишонлаб юрилмайди. 14 февралда Бобур Мирзо туғилган деб концерт қўйиб, сакраш керак эмас", - дейди Жасур Ҳамроев.

Тошкентлик Абдували эса, ёшлар "Севишганлар куни"га кўпроқ кўнгил беришини ва Бобур Мирзони умуман билмаслигини айтади. У бундай бўлишига Ўзбек маданиятига ёт байрамларнинг кенг нишонланиши ҳам сабаб бўлишини таъкидлайди.

Бу сана тарихи ҳали қадим Рим даврларига бориб тақалади.

Аммо, ҳозирги номини эрамизнинг 5 - асрида олган, яъни ушбу кун эрамиздан аввалги 290 йилда император Клавдий томонидан қатл этилган руҳоний исми билан аталган.

Ривоятларга кўра, Валентин исмли маҳбус турма нозирининг кўзлари сўқир қизини севиб қолади.

Қатл этилишидан аввал, ҳатто, қизнинг кўзларини даволаб, очишга муваффақ бўлгани ва ўлимидан аввал "Валентинингдан", деган сўзлар битилган откритка ёзиб қолдиргани айтилади.