Жаноб Видмар Ўзбекистондаги ўйин ўз жамоаси учун ўта муҳим эканини айтган
Австралиянинг Телеграф рўзномаси тарқатган хабарга кўра, Австралия олимпик футбол жамоасининг мураббийси Аурелио Видмар Ўзбекистонда ўйинчиларининг қорни оғриб қолишидан қўрқиб, профессионал ошпаз ёллаган.
"Олирулар (Австралия олимпик футбол жамоаси) Лондонга етиш орзулари чиппакка чиқмаслиги учун ғалабага ўта муҳтожлар, шундай экан Видмар 5 февралда бўлиб ўтадиган саралаш ўйинидан аввал ўйинчилари ҳожатхонадан чиқолмай ўтиришларини хоҳламайди", - дейилади мақолада.
Мақола Ўзбекистон таомлари ўтмишда ҳам австралиялик ўйинчиларни касал қилганини айтади.
Видмар жаноблари қўли остида Young Socceroos жамоаси ва қатор аделаидлик ўйинчилар Чемпионлар Лигаси доирасидаги ўйинлар чоғида ўзбек овқатларини еб, ётиб қолишган экан.
Австралия олимпик футбол жамоаси келгуси ҳафта бошида сафарга чиқади ва Ўзбекистонга боришдан аввал Дубайда бир неча кун қолади.
"Ўтмишда нималар бўлганини ҳисобга олиб, ўйинчиларимизнинг тоби қочиб қолмаслигига ҳаракат қилаяпмиз. Аввал Аделаиддан ошпаз олиб кетгандик, бу сафар ҳам ошпаз олиб борамиз. Ошпазни Дубайдаги меҳмонхонадан олиб борамиз, у биздан бир неча кун аввалроқ етиб бориб, ҳамма нарсани тайёрлаб қўяди", - деб айтган жаноб Видмар.
Австралия олимпик жамоасининг шу давргача ўйнаган барча саралаш ўйинлари голсиз дуранг билан якунланган, шундай экан жаноб Видмар Ўзбекистондаги ўйин, ҳамда 22 февралда Бирлашган Араб Амирликларига қарши ўйналадиган матчни ҳаёт-мамот жанги дея тасвирлаган.
Жаноб Видмар ўз ўйинчиларининг қорнидан ташқари, Сидней футбол клуби ярим ҳимоячиси Терри Антониснинг тизза ости пайи жароҳатидан хавотирга тушган.
Сешанба куни лат еган Антонис Ўзбекистонда ўйнаш имкониятларини "кўп борса 40 фоиз" дея баҳолаган.
Биз билан боғланинг
* Тўлдириш шарт бўлган жойлар
~RS~a~RS~uzbek~RS~q~RS~num_headlines=3&genre_name=homepage&enable_top_story_image=1&genre_path=/~RS~z~RS~18~RS~){kind=small}