Черкизов бозори ёпилиши ортидан 100 мингдан ортиқ одам ишсиз қолди

Россия Федерал миграция хизмати савдо-сотиқ билан шуғулланиш мақсадида келган хорижликларга ишлаш рухсатномаси бермасликни тавсия қилди.

Россия Федерал миграция хизматининг расмий вакили Константин Полтараниннинг айтишича, бундай хулосанинг олинишига пойтахт Москвадаги Черкизов бозори атрофида юзага келган вазият туртки бўлган.

“Россия Федерал миграция хизмати раҳбарияти иш билан таъминаш марказлари қошидаги минтақавий комиссиялар ходимларига савдо-сотиқ билан шуғулланувчи хорижий фуқароларга ишлаш рухсатномаси бермасликни тавсия этди," деб айтди Константин Полтаранин.

Ўтган ҳафта Россия Бош прокуратурасининг тергов қўмитаси, Москва маҳкамасидан Черкизов бозорига оид текширувлар ниҳоясига етгунга қадар, бозорни уч ойга ёпишни сўраганди.

Москва расмийларига кўра, бозор фаолиятининг тўхтатилишига мингдан ортиқ контейнерларда умумий қиймати 2 миллиард АҚШ долларига баробар контрабанда товарлари топилгани сабаб бўлган.

Ўз навбатида кузатувчилар Черкизов бозорининг эгаси, асли Озарбойжонлик миллиардер Тельман Исмоиловнинг Туркияда 1.5 миллиард Еврога тенг ҳашаматли меҳмона қуришни эълон этиши ортидан расмийлар бозорни ёпиш қарорини олишганига ишора этишади.

Черкизов бозорида асосан Хитой, Вьетнам ва кам миқдорда Туркиядан келтирилган моллар сотиларди.

Расмий маълумота кўра, Черкизов бозорининг ёпилиши оқибатида 100 мингдан ортиқ россиялик ва чет эл фуқаролари ишсиз қолган.

Россия Федерал миграция хизматининг маълум қилишича, Россияда савдо соҳасида
250 мингдан ортиқроқ хорижлик ишлайди. Улардан 45 мингга яқинини Ўзбекистон фуқаролари ташкил этади.