7 июл куни ҳам Хитой жамоат тартибини сақлаш полицияси Урумчи кўчаларига чиқарилди

Аксари аёллардан иборат 200 тача уйғур намойишчилари якшанба кунги ҳалокатли зўравонликлардан кейин ҳибсга олингани айтилаётган 1400 дан зиёд кишининг озод этилишини талаб қилдилар

Урумчи шаҳрида бўлган қатор хорижий журналистлар ушбу норозилик чиқишининг гувоҳи бўлганлар. Би-би-си мухбири Квентин Соммерфильднинг айтишича, бу Хитойда мисли кўрилмаган бўйсунмаслик амали бўлган

"Бизга озодлик беринг, эркакларимизни қайтаринг", дея қичқирди бу аёл

Урумчидан олинган хабарларга кўра, полиция уйма-уй юриб, ёш йигитларни бир жойга тўплаяпти, сўроққа тутаяпти. Полиция якшанба кунги ҳодисаларнинг ташкилотчиларини ҳибсга олганини, бошқаларини эса қидираётганини айтмоқда

Журналистларни норозилик чиқиши бўлган жойдан ҳайдаб чиқарганларидан кейин намойишчилар ҳам тарқала бошладилар. Бироқ ҳали полиция шу ерда эди, ундан кейин аёлларга нима бўлгани қоронғи

Урумчидаги кам сонли уйғурлар намойиши ортидан тўқмоқлар, ошпичоқлар ва қўлбола қуроллар тутган этник ханлар кўчаларга чиқиб, уйғурларга тегишли дўконлар ва бозор расталарини вайрон қилишган

Ханлар уйғурлар содир этган зўравонликларга қарши эканларини айтганлар, полиция уларни кўздан ёш сиздирадиган газ билан тарқатиб юборган

Ҳукумат этник ханларга қарши зўравонликларни уюштиришда Хитой ташқарисидаги бўлгинчиларни айблади. Хитой расмийларига кўра, якшанба куни 156 киши нобуд бўлган, мингдан зиёд киши яраланган