Мустақил журналист, Ўзбекистон

Ўзбекистоннинг энг бой ва кучли футбол жамоаси сифатида кўриладиган “Бунёдкор” футбол жамоаси ушбу ҳафта мамлакатнинг ўзида эмас, дунё матбуотида ҳам катта шов-шувга сабаб бўлган яна бир хабар тарқатди.

“Бунёдкор”нинг расмий веб саҳифаси бразилиялик машҳур мураббий Луис Филипе Сколари билан 18 ойлик шартнома имзолаганини маълум қилар экан, аввал ҳам жаҳон футболи юлдузлари билан боғлиқ шов-шувлар яратиб келган жамоанинг бу янгилигини ўзбек футбол ишқибозлари ва жамоатчилиги турлича қарши олган.

Бироқ ўтган йилларда бразилиялик ўйинчилар ва Испаниянинг “Барселона” жамоаси билан келишувларда бўлганидек бу гал ҳам шартноманинг нархи ўзбек жамоатчилиги учун сир бўлиб қолмоқда.

Сколарининг ўзи эса “Бунёдкор” веб саҳифасида келтирилган сўзларига кўра, Ўзбекистон футболи муваффақият билан ўз тарихини яратаётгани ва айниқса, “Бунёдкор” қисқагина 4 йил ичида лол қолдирувчи ютуқларга эришганини айтган.

Назаримда ҳар қанча пул эвазига бўлса ҳам шундай тренерларнинг келгани яхши. Чунки булар дунё кўрган ва тажрибали одамлар. Бой тажриба ва тактикани ўшалардан ўрганилмаса, бошқа қаердан олинади?!   ашаддий футбол ишқибози Илҳом

Жаҳон футболига юлдузлар ҳадя этиши билан танилган Сколарининг бу сўзлари ўзбек матбуотида фахр билан такрорланмоқда. Футбол ишқибозларининг фахри ҳам бундан кам эмас.

“Сколари Ўзбекистонга келишини эшитиб жуда хурсанд бўлдим, чунки “Бунёдкор” Осиё чемпионлар лигасида ютиб чиқишига ишонаман,” дейди Фаррух исмли тошкентлик футбол ишқибози.

“Лекин бошқа бир томондан бу кўпроқ дабдаба ва обрў учун қилинган бўлса керак. Шу кунларда бу хабар бутун дунёга тарқалди. Энди Осиёдаги “Бунёдкор” рақиблари ҳам Сколарининг Ўзбекистон жамоасига раҳбарлик қилаётгани эшитар экан, бизнинг жамоа обрўси ва нуфузи янада ошади деб ўйлайман,” дейди у.

Кўплаб ишқибозлар Сколари каби тренерларга тўланадиган пул жуда катта миқдорда бўлишини билади ва бу пуллар оқланишидан умид қилади.

“Назаримда ҳар қанча пул эвазига бўлса ҳам шундай тренерларнинг келгани яхши. Чунки булар дунё кўрган ва тажрибали одамлар. Бой тажриба ва тактикани ўшалардан ўрганилмаса, бошқа қаердан олинади?!” дейди ўзини футболнинг ашаддий ишқибози эканини айтган Илҳом исмли йигит.

Лекин исмини айтишни истамаган бошқа бир ишқибоз бу хил қимматбаҳо шартномаларга танқидий муносабат билдирар экан, “Бунёдкор” раҳнамолари ҳаддан зиёд пул сарфлаётганини таъкидлайди.

Балки бу бир томондан яхшидир, Ўзбекистон нуфузи учун. Бироқ биргина шу таниқли тренерга тўланадиган пулга Африкадан қанча ўйинчи олиб келиш мумкин. Ёки ўзбек ёшларининг ўзига бу пул сарфлансами, э, ана тошни ҳам копток қилиб тепиб юборади-ку,..   ўзбекистонлик футбол ишқибозларидан

“Балки бу бир томондан яхшидир, Ўзбекистон нуфузи учун. Бироқ биргина шу таниқли тренерга тўланадиган пулга Африкадан қанча ўйинчи олиб келиш мумкин. Ёки ўзбек ёшларининг ўзига бу пул сарфлансами, э, ана тошни ҳам копток қилиб тепиб юборади-ку,” дейди у.

“Мана Ривалдо ўйнаяпти “Бунёдкор”да жуда катта пулга. Мен бир жиддий ўзгариш кўрганим йўқ, чунки унинг номи бор холос, ахир у 37 ёшда ҳозир, футбол учун кексайиб қолган. Футболга 18-20 ёшли йигитларнинг шиддати керак,” сўзини якунлайди у.

Кўплаб ишқибозлар бу масалада икки гуруҳга бўлинади. Баъзилари “ўйинни ўйинчи ўйнайди, тренер эмас” деса, бошқалари ўзбек футболи халқаро тактикаларга асосланган яхши мактаб кўриши учун бундай харажатлар асосли эканини айтади, айниқса харажатларни қоплашга тайёр турган ҳомийлар бор бўлса.

Бугун аксар ўзбеклар “Бунёдкор”нинг ортида ўта қудратли дея кўрилган ва мамлакатда тобора кўпроқ бизнесни ўз қўлига киритаётган, кимлар томонидан бошқарилиши очиқ айтилмагани учун сирли туюладиган Zeromax компанияси туришини яхши билади.

Тошкентдаги Uzgazoil ёқилғи сотиш жойларида “Бунёдкор” ёрлиқлари ёпиштириб ташланган ва ёқилғи қуйувчи йигитларнинг кийимларида ҳам шу белги. Uzgazoil ёқилғи сотиш тармоғи бутун Ўзбекистон бўйлаб тарқалган ва у Zeromax қўлидаги бизнеслардан бири сифатида танилган.

	"Бунёдкор" яқиндагина бразилиялик футбол юлдузи Ривалдони сотиб олишга ҳам муваффақ бўлганди

Шу кунларда Тошкентнинг собиқ Халқлар Дўстлиги, ҳозирги Бунёдкор кўчаси ёқасида миллионлаб доллар сарфланиб “Бунёдкор” жамосининг спорт мажмуаси ва 35 минг ўринли стадион барпо этилмоқда.

Умуман олганда “Бунёдкор” номини Ўзбекистоннинг ташқи дунёдаги “ташриф қоғози” сифатида донг чиқаришига давлат даражасида аҳамият берилмоқда, дейди тошкентлик кузатувчи.

Унинг айтишича, Швейцарияда рўйхатдан ўтган ва мамлакатнинг юқори мартабали кишиларига яқин шахслар томонидан бошқариладиган Zeromax Ўзбекистон нефт ва газ соҳасида жуда йирик лойиҳаларда қатнашмоқда.

Одамлар Zeromax ҳақида жуда эҳтиёткорлик билан гапиради ёки умуман гапиришни хоҳламайди.

“Бир томондан иқтисодий жиҳатдан шундай қийин вазиятда мамлакат бойлиги сарфланяпти деб аччиғинг келса, иккинчи томондан, барибир бу пуллар халққа тегмай, бошқа томонларга кетиб қолиши мумкин эди-ку, ҳозир эса спорт учун сарфланмоқда дея ўзингни овутасан,” дейди тошкентлик ўрта ёшли киши спортга қизиқиши йўқлигини айтиб.

“Бошқа нима ҳам дердим, давлат ҳозир спорт, кино ва қўшиқчиликни ривожлантиришга жиддий эътибор беряпти. Охирида бир натижаси бордир-да. Тепада ўтирганларга биздан кўра кўпроқ нарсалар ойдин бўлса керак,” дея хулоса қилади у.