Роналдо ҳеч қачон ўзининг "Реал"га ўтиш истагини сир тутмаган

Англиянинг "Манчестер Юнайтед" клуби португалиялик ҳужумчиси Кристиано Роналдони "Реал"(Мадрид)га рекорд 131 миллион долларга сотишга рози бўлган.

Англия чемпиони клубни тарк этишга оид сўрови ортидан Роналдога "Реал" билан ўзининг шартлари бўйича гаплашиб олишга рухсат берган.

"Манчестер Юнайтед"нинг билдиришича, жорий ой охиригача бу борада бир битимга келинади.

Англия клубида кечган 6 йиллик ҳаёти давомида Кристиано Роналдо жаҳон футболининг энг ажабтовур ва маҳоратли ўйинчисига айланади.

Кристиано томонидан рақиб дарвозасига киритилган тўплар МЮнинг Англия Олий лигаси ва Оврўподаги муваффақиятларида катта ўрин тутади.

Бироқ португалиялик ўйинчи ҳеч қачон ўзининг "Реал"(Мадрид)га ўтиш хоҳишини ҳеч кимдан сир тутмаган.

Кўпчилик Роналдонинг ўтган футбол мавсумида испан клубига ўтишини кутган эса-да, бироқ МЮ уни сотишдан бош тортганди.

Ҳозир эса, дунёнинг истаган ўйинчисини қўлга киритиши билан ном қозонган Флорентино Перезнинг "Реал"президентлигига қайтиши ортидан МЮ улар таклиф қилаётган маблаққа рози бўлишга қарор қилган кўринади.

Ўзларига бор-йўғи 20 миллион долларга тушган ўйинчини 100 миллион доллардан ортиқроққа сотиш МЮ учун ажойиб савдо битими эканига шубҳа йўқ.