Сколарининг "Бунёдкор"га қанчага тушгани маълум эмас

'Бунёдкор' бразилиялик таниқли мураббий Луис Фелипе Сколари билан 18 ойга мўлжалланган шартнома имзолаган. Бироқ унга қанча ҳақ тўланиши ҳозирча номаълум.

Сколарини мураббий ўлароқ қўлга киритиш ҳам "Бунёдкор" ва ҳам Ўзбек футболининг амбицияларини акс эттиради.

Ўзбекистоннинг етакчи клубини эндиликда Бразилия ва Португалия миллий терма жамоларининг собиқ мураббийи шуғуллантиради.

Жаноб Сколари клуб ҳамда Болалар футбол академияси фаолиятларига ҳам йўриқчилик қилади.

Ажойиб муваффақият

Бу Ўзбекистон чемпиони учун ажойиб муваффақият. Бор-йўғи бир йил муқаддам дунёдаги энг қудратли футбол клубларидан бири бўлган Англиянинг "Челси" жамоасига устозлик қилган мураббий билан шартнома имзолаш "Бунёдкор"нинг мақсадлари қанчалик узоқни кўзлашига далолат қилади.

"Бунёдкор" жорий йилда эришган ютуқлари қаторига Осиё Чемпионлар лигаси чемпиони унвонини ҳам қўшиш ниятида.

Сколари Ўзбекистонга ўзи билан бирга жуда бой тажрибасини ҳам олиб келади. Бразилия миллий терма жамоаси 2002 йилда айнан Сколари мураббийлигида Жаҳон чемпионлигини қўлга киритганди.

Ўтган ёзда "Челси" жамоаси билан шартнома имзоламасидан аввал Португалия миллий жамоасига ҳам моҳирона устозлик қилган.

Бироқ "Челси"даги фаолияти муваффақиятли кечмайди. Бунга футбол мавсумининг кўнгилсиз кечганидан кўра, Англия Олий лигасидаги жуда кучли босим кўпроқ сабаб бўлганди.

Бунинг ортидан Сколари ўтган феврал ойида ўз вазифасидан четлатилган ва Тошкентга ўтиш қарорига келмасидан аввал бундан бошқа ҳам таклифларни кўриб чиқаётган бўлган.

Бу жаноб Сколарининг Оврўпо ва Бразилиядан ташқарида қилаётган илк мураббийлик фаолияти эмас. У бундан аввал Япония миллий жамоаси, Саудия Арабистони ва Қувайтдаги клубларга ҳам бошчилик қилган.

"Керакли жойда,..."

"Бунёдкор" клуби веб саҳифасида чоп этилган баёнотда айтилишича, жаноб Сколари, сўнгги янгилик ортидан "керакли жойда, керакли вақтда ва керакли жамоада эканига амин"лигини билдирган.

Бор-йўғи бир неча йил аввал ташкил этилган клубнинг мақсадлари осмонўпар - у қисқа вақтнинг ичида ажойиб ютуқларни қўлга киритди.

Клуб жорий йил бошида дунёнинг наҳанг клубларидан бўлган "Барселона" билан шартнома имзолаб, уларнинг иншоатларидан фойдаланиш ва Nou Campда ўртоқлик учрашуви ўтказиш учун Испанияга сафар қилишга муваффақ бўлди.

Мазкур битимнинг 5 миллион еврога тушгани айтилган ва у "Барселона"нинг жавоб ўйинини ўтказиш учун шу йил куз ойларида Тошкентга сафар қилишини ҳам кўзда тутади.

Хорижий футбол тажрибаси ва иқтидори бундан аввал ҳам ёт бўлмаган "Бунёдкор"да жорий пайтда тўрт бразилиялик ўйинчи тўп суради. Уларнинг орасида энг таниқлиси Бразилия футболи юлдузи Ривалдодир.

"Бунёдкор" буларнинг барчаси учун пулни қаердан олиши маълум эмас, жамоанинг бошқарув таркиби ҳақида ҳам шундай деса бўлади.

Бироқ Ўзбекистондаги асосан нефт ва газ тармоғида фаолият олиб борувчи етакчи Zeromax ширкатининг клуб ҳомийларидан экани айтилади.