Испаниянинг "Барселона" клуби Римда бўлиб ўтган якуний беллашувда Англиянинг "Манчестер Юнайтед" жамоасини 2:0 ҳисобида мағлуб этиб, ҳақли ғалабани қўлга киритган.

МЮ клуби мураббийси Алекс Фергюсон жамоасининг мағлубияти ортидан рақибларининг ўзларидан кўра кучли бўлганини тан олган.

"Манчестер Юнайтед" ўтган йилги чемпионлар Лигасининг финал беллашувида ўз ватандошлари "Челси" жамоасини жарима тўплари ҳисобига мағлуб этган ва бу гал ҳам ғалаба қозонса, футбол тарихида ушбу унвонни кетма-кет иккинчи бор қўлга киритган клубга айланарди.

"Барселона" янги мураббийси Хосепа Гвардиоли бошчилигида бу йилги футбол мавсумида Испания чемпионлиги ва Испания кубогини ҳам қўлга киритишга муваффақ бўлганди. Энди эса, чемпионлар Лигаси чемпиони...

Бундан аввал ҳеч бир испан жамоасига бир мавсумнинг ўзида ҳар уч турнирда ғалаба қозониш насиб этмаганди.

Ўзбекистонлик таниқли футбол шарҳловчиси Аброр Имомхўжаевнинг айтишича, бу икки наҳанг жамоа орасидаги беллашув Ўзбекистонда ҳам катта қизиқишга сабаб бўлган:

Аброр Имомхўжаев: Оврўпо чемпионлар Лигасининг якуний беллашуви деган билан кечаги ўйин дунёнинг энг кучли иккита жамоаси ўртасидаги тўқнашув эди. Шунинг учун ҳам беллашув бошқа мамлакатлар қатори Ўзбекистонда ҳам катта қизиқишга сабаб бўлди. Мен буни биттагина мисол орқали сизга айтишим мумкин: Худди ўша пайтда Осиё чемпионлар Лигасининг ним чорак финалида "Пахтакор" жамоаси ҳам сафарда тўп суриши керак эди. Бу иккита беллашув бир вақтга тўғри келиб қолганди. Лекин "Спорт" канали МЮ ва "Барселона" ўртасидаги учрашувни тўғридан-тўғри олиб узатди. Хоҳлаган мухлислар эса, "Пахтакор"нинг ўйинини "Ёшлар" телеканали орқали томоша қилишди. Бироқ асосий аудитория барибир Оврўпо чемпионлар Лигасининг финал беллашувини кўришди, деб ўйлайман. Чунки бу - жуда юқори савиядаги футбол спектакли эди...

Би-би-си: Шундай экан, ўзбекистонлик ишқибозлар кечаги беллашувда қай бир жамоага ишқибозлик қилишди?

Аброр Имомхўжаев: Ўзбекистонда ҳар иккала жамоанинг ҳам ишқибозлари кўп. Ҳатто интернет орқали сўровлар ўтказилганда ҳам натижалар деярли 50:50 бўлди. Ярим одам МЮ ва ва ярим одам "Барселона"га ишқибозлик қилиши маълум бўлди. У жамоанинг ҳам, бу жамоанинг ҳам мухлислари жудаям кўп. Чунки иккала жамоа ҳам чиройли, очиқ, ҳужумкор руҳда футбол намойиш этишади. Шунинг учун ҳам алоҳида битта жамоани олиб, шунга жуда кучли ишқибозлик қилишди, десак нотўғри бўларди.

Би-би-си: Агар футболча терминда айтадиган бўлсак, кечаги беллашувда "Барселона" жамоаси Оврўпо чемпионлар Лигасининг уч карра чемпиони "Манчестер Юнайтед" жамоасини "қуруқ" - 2:0 ҳисобида мағлуб этди. Масалан, ўзбекистонлик ишқибозлар "Барселона"нинг бу каби ғалабасини қандай кутиб олишди?

Аброр Имомхўжаев: Жудаям яхши кутиб олишди. Чунки ўйиндан олдин ўтказилган сўровларда, барибир, озгина устунлик "Барселона"га берилганди. Сабаби - "Барселона" ҳозир жудаям чиройли футбол намойиш этаяпти. Ўзларининг йўлларида ҳеч кимни аяшаётгани йўқ. Ҳаттоки асосий рақиби "Реал"ни ўз майдонида йирик ҳисоб билан мағлуб этгани ҳам жуда катта шов-шувларда сабаб бўлганди. МЮ кучли жамоа бўлгани билан, лекин, "Барселона"нинг индивидуал юлдузларига бас келиш қийинлигини мухлислар барибир билишарди. Шу жиҳатдан олиб қараганда, улар "Барселона" ҳақли равишда ғалаба қозонди, деб ҳисоблашмоқда.

Би-би-си: МЮ да ҳам юлдуз футболчилар озмунча эмас, шундай эмасми? Сизнинг назарингизда, кечаги ўйинда "Қизил иблислар"га нима панд берди?

Аброр Имомхўжаев: МЮга ўзи танлаган йўл панд берди, деб ўйлайман. Учрашувдан аввал мендан сўрашганда, "МЮ худди "Челси"га ўхшаб ўйин намойиш этган тақдирдагина "Барселона"ни тўхтатиши мумкинлигини айтгандим. Яъни, ҳимоявий, ёпиқ футбол намойиш этган тақдирдагина...Лекин "Манчестер Юнайтед"дек жамоа буни ўзига эп билмас эди. Улар ҳужумкор футболга ҳужумкор футбол билан жавоб қайтаришни маъқул кўришди. Ва кечаги ўйин ҳозир дунёнинг ҳеч бир жамоаси очиқ футболда "Барселона"ни мағлуб эта олмаслигини кўрсатди. Айни шу жиҳатдан "Барселона" ғалаба қозонди, деб ўйлайман.