Ишқибоз

Ҳайрон қоласан киши - футбол биринчилигими бу ё сарватмандларнинг кимошди савдоси?..

Шўролар даврида бир бой миллат ҳақида миш-миш гап юрарди: эмишки, уларда бир ўйин бормиш. Кўчага чиқдингми, ошнангга йўлиқдингми - қани, кимнинг киссасида пул кўпроқ деган ўйинмиш. Кимнинг чўнтагида пул кўпроқ чиқадиган бўлса, ўша ютармиш. Ана шу "пулимиз билан ўлчашайлик" деган ўйиннинг бир тури бошланиб кетгандек Инглиз биринчилигида. Ким сотиш билан овора,..дейлик, “Манчестер Юнайтед” бу борада жаҳон рекордини қўйиб, Кристиано Роналдони оз эмас, кўп эмас, 80 миллион фунтга Мадриднинг “Реал”ига сотган эса, кимдир бор пулига дунёнинг энг яхши футболчиларини териш билан билан машғул:

Ўша Манчестер шаҳрининг бошқа чеккасида “Манчестер Сити” жамоаси оз эмас, кўп эмас - 100 миллион фунт маблағни “Арсенал”дан Эммануэль Адебайор, Коло Туре, “Манчестер Юнайтед”дан Карлос Тевез, “Астон Вилла”дан Гаретз Барри ва бошқа юлдузларни сотиб олишга сарфлади.

Биринчилик ҳали бошланмаган экан, бор эҳтирос шов-шув гапларга берилган, қизиғи шуки, гап кўпроқ ким биринчи ўринни олиши ҳақида эмас, балки ким биринчи тўртликка кириши ҳақидадир.

Биринчи ўрин ҳақида башорат қилишга камроқ одамнинг юраги дов қилади, рост-да, ўтган мавсум ғолиби – “Манчестер Юнайтед” ўзининг энг зўр бомбардимони Кристиано Роналдодан ажраб, ўрнига Уэйн Руней қатори, мана, бир неча йил ҳимоячилар билан эмас, кўпроқ ўзининг жароҳатлари билан курашиб келаётган Майкл Оуэн ва унинг яримҳимоячи шерикларини ишлатмоқчи. Бу хусусда уларнинг бўйнига қандай бўлмасин 100 та гол уриш социалистик мажбурияти ҳам қўйилган.

“Ливерпуль” ҳам ўзининг асосий ўйинчиларидан бири Чаби Алонсодан ажрайдиганга ўхшайди.

“Челси” билан “Арсенал” эса янги ўйинчиларга деярли пул сарфлашгани йўқ. Бироқ айтганимиздек, “Манчестер Сити” араб шайхларининг қўлига ўтганидан сўнг пулини аямади - ҳужумини даҳшатли даражада кучайтирди, ҳимоясини ҳам Коло Туре билан мустаҳкамлади. Бор гап энди “Манчестер Сити”нинг бояги тўртликка кириш-кирмаслиги устида кетяпти.

Муҳокамадаги яна бир гап - пул билан ўйинни ютиб бўладими ё жамоани йиллаб тайёрлаш, ундириб-ўстириш керакми деган гап. “Арсенал” тренери Арсен Венгер - "мана, сен калтафаҳм, Адебайор ва Туредек энг яхши икки ўйинчингни энг ашаддий рақибингга сотдинг" деган танбеҳларга қарши, бизнинг жамоа миллий банк эмас, футбол жамоаси ва ўзининг ёш қобилиятини майдонда кўрсатади,” қабилидаги гапларни қилмоқда. Унинг гапида ҳам жон бордек, дуруст-да, мана, “Челси” ҳам бундан уч-тўрт йил аввал дунёнинг энг яхши ўйинчиларини териб-териб сотиб олганди, барибир кўпам нарсага эришмади-ку, дейишади унинг тарафдорлари.

Ҳозирча гап кўп, ҳар ким ўзининг ҳақлигини исботлашга тиришмоқда, бироқ охирул-оқибат бу гапларнинг бари ҳақида хулосани ўйину мусобақанинг ўзи чиқаради. Биз, мухлислар учун эса, буниси яна бир байрам, энди тўрт энг зўр жамоа эмас, балки бешта, балки-да олтита жамоанинг гиж-бадабанг рақобатини томоша қиладиган бўлдик.