14 Июн, 2008 - Published 07:48 GMT
عنایت الله فرهمند
کابل
"تاغه تیمیرچی و توپلنگ کونی"
افغانستانلیک مشهور یازوچی قادر مرادی نینگ "تاغه تیمیرچی و توپلنگ کونی" اسملی اوزبیک تیلیگه اوگیریلگن داستانلر توپلمی باسیب چیقاریلدی
مزارشریفده گی میرزا اولوغ بیگ مدنی بنیادی تمانیدن چاپ ایتیلگن اوشبو کتاب ده قادر مرادی نینگ اوزبیک تیلیده اوگیریلگن ییتی قیسقه و یوقاری داستانلری اورین آلگن
قادر مرادی نینگ تورلی ییللرده یازیب چیققن داستانلری آلمان ده حیات کیچیره یاتکن ذاکر عمری اسملی یاش قیزیقوچیلریدن بیری تمانیدن اوگیریلگن
بیر یوز و اوتیز بیتلیک اوشبو کتاب میرزا اولوغ بیک مدنی بنیادی نینگ باشلیغی هدایت الله هدایت جنابلری نینگ یازوسی بیلن باشلنگن
هدایت جنابلری یازگن سوز باشیده، اوشبو کتاب نی باسیب چیقاریلیشی اوزبیک تیلی و مدنی بایلیگی گه قوشیلگن ایجابی بیر حصه دیب بهالنگن
داستانلر باشلنیشیدن آلدین یازوچی قادر مرادی نینگ حیاتی و ایجادیاتی و شونینگدیک داستانلرنی اوزبیک تیلیگه اوگیرگن ذاکر عمری نینگ قیلگن سعی و حرکتی تیلگه آلینگن
بوندن آلدین هم ذاکر عمری ترکیه نینگ مشهور یازوچیلریدن بولگن عزیز نسین نینگ بیر نیچه طنزلرینی دری تیلیده اوگیریب، آلمان ده نشر ایتکن ایدی
اوشبو اوزبیک تیلیده اوگیریلگن داستانلر توپلمی ایریم اوزبیک یازوچیلر و اوقوچیلری تمانیدن ایجابی بیر آدیم دیب بهالنه دی، چونکه عمری جنابلری داستانلرنی ایریم اوزبیک تیل متخصصلری نظری آستیده اوگیریلگنینی ایتکن
شو یوزدن اوشبو اثرنی افغانستان ده گی اوزبیک تیلیده اوگریش هنرینی رواجلنتریش اوچون آلغه قویلگن ایلک آدیملردن سنش ممکن
 |
 |
| حاضرگه چه اوشبو یازوچی نینگ ییتی اثری باسیب چیقاریلگن |
قادر مرادی افغانستان شمالیده گی مزارشریف شهریده توغیلیب، فاریاب ولایتی نینگ اندخوی اولوسواللیگیده ابتدائی اوقیشینی بیتیرگن. کیینچه لیک کابل عالی اوقو یورتی نینگ ژورنالیزم بولیمیدن فارغ بولگن. حاضر مرادی جنابلری هالند ده حیات کیچیره دی
حاضرگه چه قادر مرادی نینگ دری تیلیده یازگن آلتی داستانلر توپلمی کتابی چاپ دن چیققن
او نینگ دری تیلیده یازگن داستانلری اوتکن بیر نیچه اون ییلدن بیری افغانستان و تشقی اولکه لرده حیاتی کیچیره یاتکن افغانلر تمانیدن سیویلیب اوقیله دی
تاغه تیمیرچی و توپلنگ کونی داستانی دن بیر پرچه
بازار کونی ایدی ، کیچکینه شهرچه چنگ و توزان توفانی ایچیده تلپینر ایدی . قیشلاق لیکلر اوزاق – یاووق قیشلاقلردن شهر گه کیلگن ایدیلر . کوچلی شمال کوچه و جاده لرده قوتوریب ایسردی . بوتون آسماننی چنگ و توپراق اوره ب آلگن و قویاش کورینمس ایدی .
تیمیرچیلر رسته سیده ، تاغه نینگ دکانی قرشیسیده آتلری نینگ تویاغیگه نعل قاقتیرش اوچون بیر نیچه قیشلاقلیکلرتوخته گن ایدی . تاغه آتلردن بیری نینگ تویاغیگه نعل قاقرایکن ، یوزی نینگ تیرینی کویلگی یینگی بیلن ارتدی – ده یانیده تورگن ییگیتگه راحتسیزلیک بیلن :
- اشتراک قیلمه یمن ، من اخبارنی نیمه قیله من ؟ دیدی .
قولیده کاغذ و قلم بار ییگیت غضب بیلن :
- اشتراک ایتیشینگ کیره ک . چون که همه دکاندارلر اشتراک ایتگنلر ، دیدی
شمال ایند یگینه بنددن آزاد بولگن تیلبه گه اوخشب هر طرفگه یوگوررو توپراق لرنی آدملر نینگ یوز و باشیگه ساچر ایدی...