Шимолий тожикистонлик 'Горбачёв' Абдужалил...

“ Беш-ўн йилдан кейин Тожикистонни танимай қоласиз...”

Мактабда ўқиб юрган кезлари Абдужалил Ортиқовнинг лақаби бор эди.

Доим илғор ва янгиликка интилувчан бўлгани учун уни синфдошлари Горбачёв деб аташарди.

Бугун Абдужалил Ортиқов шимолий Тожикистондаги кўзга кўринган тадбиркорлардан бири.

Абдужалил Шўролар Иттифоқи қулаганидан кейин мавжуд имкониятларнинг баридан фойдаланишга ҳаракат қилган тадбиркор.

“Шўролар даврида “спекулянт”, деган гап бор эди. Қаерлардандир нарса топиб олиб келиб сотасан, бугунги тил билан тадбиркорлик қиласан, яна лақаб орттирасан,..” деб хотирлайди Абдужалил.

Бугун Абдужалил транспорт ширкатига эга.

Бу транспорт ширкати 1970-йилларда иш бошлаган.

Абдужалил 1997 йили акалари билан бу корхонани давлатдан сотиб олади.

Абдужалил акани синфдошлари Горбачёв деб аташарди...

“Акаларимдан бирида юк машинаси бор эди. Мен ўшандаёқ билгандим бу иш анча даромад олиб келишини...Қолаверса, акам ҳам транспорт ширкатини сотиб олишга иштиёқманд эди. Ҳозир жуда мамнунман шундай йўл тутганимиздан...”

Абдужалил ҳозирги ўлчовлар билан халқаро олди – сотдига киришди. Россиядан ун маҳсулотларини келтириб сотишни йўлга қўйди. Россиядан келтирилган моллар кейин унинг юк машиналарида деярли бутун мамлакатга тарқатилади.

Абдужалилни, таъбир жоиз бўлса, туғма оптимист ё некбин деб таърифлаш мумкин.

Аммо Тожикистонда тадбиркор бўлиш осон эмас.

Халқаро ташкилотлар бу мамлакатни энг коррупциялашган давлатлар рўйхатига киритган.

Абдужалил ўзи коррупция мутлақо йўқ деб инкор қилмайди, аммо ўзим ҳеч рўпара келмаганман, дейди.

Абдужалил Ортиқов:

"Ўтган ўн йил ичида бизнинг ютуқларимиз жуда катта, бунга кўз юмиб бўлмайди. Мана, шаҳарларимизга қаранг..."

“ Коррупцияга қарши катта кураш кетмоқда бизда,..” дейди ва ҳукуматнинг амалларини қўллаб-қувватлашини урғулайди.

Лекин шу билан бирга Тожикистонда коррупциядан нолиётганлар оз эмас.

Ҳатто маҳаллий матбуотда ҳам бот-бот бу мавзуни кўтариб чиқаётган мақолаларга кўзингиз тушади.

Тожикистонда аста-секинлик билан бўлса-да, маҳаллий ишлаб чиқариш ҳам ривожланиб бормоқда

Бошқа бир муаммо Хитойнинг арзон ва аксар ҳолатларда сифатсиз моллари...маҳаллий ишлаб чиқарувчилар учун рақобат конига айланган.

Бозору дўконлар ана шундай маҳсулотларга тўла...

Абдужалилни эса бу қаттиқ ташвишга солаётгани йўқ.

“ Аста –секинлик билан бўлса ҳам бизнинг маҳсулотлар кўпаймоқда. Мана, унни ўзимизда ишламоқдамиз. Четдан келганлари жуда оз...ўтган ўн йил ичида бизнинг ютуқларимиз жуда катта, бунга кўз юмиб бўлмайди. Мана, шаҳарларимизга қаранг", дейди у.

“ Беш-ўн йилдан кейин Тожикистонни танимай қоласиз...”

Давоми бор