'Қозоғистон билан ҳамкорлик? Инсон ҳуқуқлари-чи?..'

Олмония раҳбари мамлакати саноати учун муҳим эканини айтиб, қозоқ раҳбари билан имзолаган шартномаларини ҳимоя қилиб чиққан

Олмония канцлери Ангела Меркел Қозоғистон Президенти Нурсултон Назарбоев билан умумий қиймати бир неча миллиард АҚШ долларига тенг шартномалар имзолагани учун инсон ҳуқуқлари фаолларининг танқидлари остида қолиб кетган.

Президент Назарбоевнинг Олмонияга икки кунлик сафари давомида имзоланган янги битимлар олмон ширкатларига Қозоғистоннинг ноёб металлар захираларига кенг йўл очади.

Аён бўлишича, бу каби металлар ўта замонавий технологик ускуналар ишлаб чиқаришда қўлланади.

Олмония раҳбарига кўра, эришилган келишувлар мамлакати саноати учун ниҳоятда муҳимдир.

Меркел хонимнинг айтишича, иқтисоди жадаллик билан ривожланиб бораётган давлатлар билан рақобатда бу каби муҳим хом-ашёга имкониятни қўлга киритиш катта гап.

Қозоғистон уран ишлаб чиқариш бўйича жаҳондаги энг илғор давлатлардан бири саналади.

Аммо ноёб минераллари ва металларини фақат яқиндан бошлаб четга сотишни йўлга қўйган.

Мен айтдим

Қозоғистон президенти эса, мамлакатидаги инсон ҳуқуқлари билан боғлиқ саволларга муфассал жавоб беришдан ўзини олиб қочган

Олмония канцлерининг расман баён қилишича, президент Нурсултон Назарбоев билан учрашуви чоғида инсон ҳуқуқлари масаласини кўтарган.

Ангела Меркел хонимга кўра, қозоқ раҳбарини ўтган йил декабр ойида ғарбий Жанаўзен шаҳрида камида 16 кишининг ўлдирилиши юзасидан тергов олиб боришга ундаган.

Унинг айтишича, жаноб Назарбоев ўзига инсоний талофатлардан афсусда экани ва юз берган воқеанинг тагига етишини айтиб, жавоб берган.

Аммо, Ғарб матбуотида чоп этилган хабарлардан аён бўлишича, "Қозоғистоннинг келаси 10 йил ичида Олмония даражасига етишини кутиб бўлмаслиги"ни айтиб, қозоқ раҳбари инсон ҳуқуқларига оид саволларга муфассал жавоб беришдан ўзини олиб қочган.

Қозоғистон президенти, ўз ўрнида, демократия "мамлакати бораётган йўлнинг ибтидосида эмас, интиҳосида"эканини айтган.

Нурсултон Назарбоев демократия соҳасида аллақачон муайян ютуқларга эришишганини таъкидлаб, олмон ширкатларини ноёб металлар баҳона ўз мамлакатига кўпроқ сармоя киритишга ундаган.

"Хьюман Райтс Вотч" халқаро инсон ҳуқуқларини сақлаш ташкилоти эса, Қозоғистонда инсон ҳуқуқлари билан боғлиқ аҳвол абгорлашиб бораётганини айтиб, Олмониянинг қарорини танқид қилган.

Халқаро ташкилотга кўра, мавжуд вазият назарда тутилса, Қозоғистон ишончли савдо ҳамкори бўлолмайди.

Ғарб матбуотидаги хабарларга таянилса, Қозоғистон президенти Олмония томони билан элликка яқин шартнома имзолаган. Уларнинг орасида Қозоғистон темирйўл тизимини замонавийлаштиришга оид битимнинг ҳам борлиги айтилади.

Ўтган йил турли нашрларда Олмониянинг Гамбург шаҳрида тиббий муолажа олгани айтилган Нурсултон Назарбоев ҳозир "соғлиғи аъло даражада" эканини ҳам айтган.