Қозоғистонда яна иккита партия парламент ўринларини қўлга киритди

Қозоғистонда бўлиб ўтган сайловлар дастлабги натижаларига кўра, иккита янги партия илк бор парламентдан ўрин олишга муваффақ бўлган.

Иқтидордаги "Нур Отан" партияси эса, кутилганидек аксарият овозларни қўлга киритган.

Президент Нурсултон Назарбоев раҳбарлигидаги ушбу партия 2007 йилги сайловларда парламент қуйи палатасидаги 107 ўриннинг ҳаммасини эгаллаганди.

"Ақ Жол" ва Коммунистлар партиялари тўплаган овозлар эса, 7% ортиқни ташкил этган.

Парламентда бирон бир ўринни эгаллаш учун камида 7 фоиз овозни қўлга киритиш талаб қилинади.

Расмийлар сайловлар адолатли ўтганини айтишади, аммо мухолиф кузатувчилар кенг миқёсда ноқонунбузарликларга йўл қўйилганини даъво қиладилар.

Халқаро кузатувчилар ҳам Қозоғистон парламент сайловлари демократия андазаларига мувофиқ ўтмаганини айтишган.

Оврўпода Хавфсизлик ва Ҳамкорлик Ташкилотига кўра, овоз бериш жараёни қаттиқ назорат муҳитида ўтган.

Сайловларни аслида шу йилнинг августида ўтказиш режаланган эди.

Аммо, Президент Назарбоев ўтган йил ноябрида парламентни тарқатиб юборган ва муддатидан илгари сайловларни эълон қилган.

Расман "Миллат раҳнамоси" мақоми берилган жаноб Назарбоев ўтган йил апрелида 95 ярим овоз билан яна бир муддатга президентликка сайланган.

71 ёшли Нурсултон Назарбоев Қозоғистонни совет давридан буён бошқариб келади.

Унинг бошқаруви сиёсий барқарорлик ва иқтисодий ислохотлар учун олқишланган, аммо яккаҳокимлиги учун танқид қилинади.

Кутилган натижалар

Ҳозиргача маълум натижаларга кўра, иқтидордаги "Нур Отан" партияси тўплаган овозлар 80 фоизни ташкил этган.

Би-би-сининг Марказий Осиё бўйича мухбири Райҳон Демитри партиянинг ғалабаси кутилмаган ҳодиса эмаслигини айтади.

Сайловда иштирок этган тўртта партия парламентдан ўрин олиш учун лозим бўлган овозларни қўлга кирита олмаган.

Парламентга кирадиган иккита партия эса, кенг миқёсда ҳукумат дастагига эга.

Овоз бериш жараёнлари ўтган ой Жанаўзенда содир бўлган тартибсизликлар манзарасида ўтган.

Иш ташлаган нефтчилар билан полиция ўртасидаги тўқнашувларда камида 16 инсон ҳалок бўлган.

Жанаўзендаги комендантлик соати январ ойи охиригача узайтирилган.

Президент Назарбоев мамлакат Конституциявий Кенгашининг Жанаўзенда сайловларни бекор қилиш ҳақидаги қарорига вето қўйганди

Марказий Сайлов Комиссияси Жанаўзенга кузатувчиларнинг қўйилишини айтган.

Аввалроқ мухолифат нашри бўлган "Голос Республики" рўзномаси мухбирларининг Жанаўзенга қўйилмагани ҳақида хабарлар олинган, аммо кейинроқ журналистларнинг ўзлари шаҳар комендантига мурожаатларидан сўнг рухсат берилганини айтишган.