پاکستانی فوج افغان فوج کو تربیت دے گی

افغان حکومت نے کہا ہے کہ ترکی کے دارالحکومت استنبول میں پاکستان، افغانستان اور ترکی کے درمیان سہ فریقی کانفرنس میں ایک معاہدہ طے پایا ہے جس کی بنیاد پر پاکستان کی فوج افغان فوج کی تربیت کرے گی۔

کابل سے بی بی سی کے نمائندے سعید انور نے اطلاع دی ہے کہ افغان حکومت نے کہا ہے اس سہ فریقی معاہدے کی بنیادوں پر ان تینوں ملکوں کی افواج مشترکہ فوجی مشقیں بھی کریں گی۔

پاکستان نے ماضی میں متعدد بار افغانستان کو افغان فوجیوں کی تریبت کرنے کی پیش کش کی تھی لیکن افغان حکومت کی طرف سے اسے کبھی مثبت جواب نہیں ملا۔

سعید انور نے کہا کہ افغان وزارتِ خارجہ کے ترجمان جانان موسی زئی نے اس معاہدے کی کوئی مزید تفصیل فراہم نہیں کی۔

ادھر پاکستان کی دفترِ خارجہ کی ترجمان تہمینہ جنجوعہ نے بھی ایسے اشارے دیئے ہیں۔ پاکستان کی سرکاری خبررساں ایجنسی کے مطابق دفتر خارجہ کی ترجمان نے بتایا کہ سہ فریقی کانفرنس کے موقع پر دو یاداشتوں پر دستخط ہوئے جن میں سے ایک مشترکہ فوجی مشقوں کے متعلق اور دوسری افغان پولیس کو تربیت فراہم کرنے کے بارے میں ہے۔

انہوں نے کہا کہ پاکستان افغانستان میں امن، استحکام اور خوشحالی دیکھنا چاہتا ہے اور اس بارے میں ہونے والی تمام کوششوں کی حمایت کرتا ہے۔