ایران کو مزید مخالفت کا سامنا

جاوید سومرو

بی بی سی اردو ڈاٹ کام، پٹسبرگ

ایران کی جانب سے اس اعلان کے بعد کہ اس کے پاس یورینیم افزودہ کرنے کا ایک اور پلانٹ بھی موجود ہے، امریکہ اور دیگر مغربی ممالک کو ایران پر دباؤ بڑہانے کے لیے مزید مواد حاصل ہوگیا ہے۔

ایران کے اس اعلان سے قبل امریکہ اور برطانیہ شاید دو ایسے ممالک تھے جو ایران کے خلاف سخت اقتصادی پابندیوں کے حق میں تھے، لیکن اب پٹسبرگ میں جاری جی ٹوئنٹی کے سربراہی اجلاس کے دوران اس طرح کے اشارے مل رہے ہیں کہ اگر ایران کے خلاف اقوام متحدہ کی سلامتی کونسل میں پابندیوں کی قرارداد پیش کی جاتی ہے تو اس کی حمایت امریکہ اور برطانیہ کے علاوہ فرانس، روس اور جرمنی بھی کریں گے جبکہ بعض مسلمان ممالک بھی قرارداد کی حمایت کے لیے پر تول رہے ہیں۔ تاہم سعودی عرب اور مصر وغیرہ غیر حاضر ہونے کے اشارے دے رہے ہیں۔

روس نے، جو اب تک ایران کے خلاف سخت موقف اختیار کرنے سےاجتناب برت رہا تھا، جمعہ کے روز ایک غیر معمولی سخت بیان جاری کیا ہے۔ روسی بیان میں کہا گیا ہے کہ ایران کی جانب سے خفیہ پلانٹ کی موجودگی کا انکشاف اقوام متحدہ کی سلامتی کونسل کے فیصلوں کی مکمل خلاف ورزی ہے۔

روس نے مطالبہ کیا کہ ایٹمی معاملات کے نگران عالمی ادارے آئی اے ای اے کو ایران کے خفیہ نیوکلیئر پلانٹ کی لازمی طور پر تحقیقات کرنی چاہئیں اور ایران لازمی طور پر ان تحقیقات میں ہر طرح کی مدد فراہم کرے۔

اس سے قبل امریکہ، فرانس اور برطانیہ کے رہنماؤں نے ایک مشترکہ بریفنگ میں انکشاف کیا تھا کہ انہوں نے آئی اے ای اے کو قم میں ایران کے ایٹمی پلانٹ سے متعلق تفصیلی ثبوت فراہم کیے ہیں۔ ان ممالک نے دھمکی دی کہ اگر ایران نے اپنی بین الاقوامی ذمہ داریاں پوری نہیں کیں تو اس کے خلاف سخت معاشی پابندیاں نافذ ہوسکتی ہیں۔

مبصرین کا خیال ہے کہ عالمی طاقتیں یکم اکتوبر کو ایران کے ساتھ ہونےہ والے مزاکرات کے نتائج کا اعلان کریں گے اور اگر ایران کی جانب سے اس کے ایٹمی پروگرام سے متعلق مثبت اشارے سامنے نہیں آتے تو امریکہ اور اس کے اتحادی ایران کے خلاف سلامتی کونسل سے رجوع کریں گے۔

لیکن سوال یہ کہ ایک ایسی صورتحال میں جہاں امریکہ کے لیے ایران کے خلاف جنگ کرنے کا سوال ہی پیدا نہیں ہوتا، کیا ایران اقتصادی پابندیوں سے گھبرا کر اپنے ایٹمی پروگرام پر سمجھوتا کرے گا؟

بی بی سی سے وابستہ ایک ایرانی تجزیہ نگار مجید جنیدی کا خیال ہے کہ ایران کو عالمی طاقتوں کی دھمکیوں کی کوئی پرواہ نہیں۔ مجیدی کے مطابق یہ پابندیاں ایک طرح سے ایران کے قدامت پسند حکمرانوں کے لیے فائدے مند ثابت ہوسکتی ہیں کیونکہ جب ان پابندیوں کے اثر کی وجہ سے غربت اور مفلسی اور بڑھے گی تو ایرانی عوام کی امریکہ اور مغرب کے لیے نفرت میں اضافہ ہوسکتا ہے۔

ایسے حالات میں بعض تجزیہ نگاروں کے بقول ایران کی ایٹمی تنصیبات پر اسرائیل کے ذریعے حملہ کرائے جانے کو خارج از امکان نہیں کیا جا سکتا۔