رونالڈو یہ ایوارڈ جیتنے والے دوسرے پرتگالی کھلاڑی ہیں

گزشتہ سیزن میں رونالڈو نے شاندار فارم کا مظاہرہ کرتے ہوئے بیالیس گول کیے تھے اور مانچسٹر یونائیٹڈ کو انگلش پریمیئر لیگ اور چیمپئنز لیگ جتوانے میں اہم کردار ادا کیا تھا۔

رونالڈو انگلش پریمیئر لیگ سے تعلق رکھنے والے پہلے کھلاڑی ہیں جنہیں یہ اعزاز ملا ہے۔اس ایوارڈ کے لیے تیئس سالہ رونالڈو کا مقابلہ اے سی میلان کلب کے کاکا، لیورپول کے فرنینڈو ٹوریز اور بارسلونا کے لیونو میسی اور زاوی سے تھا۔

فیفا فٹبالر آف دا ایئر کے انتخاب میں دنیا کے ایک سو پچپن ممالک کی فٹبال کی قومی ٹیموں کے کوچز اور کپتانوں نے حصہ لیا اور رونالڈو کو منتخب کیا جبکہ ارجنٹائن کے لیونو میسی دوسرے نمبر پر رہے۔

رونالڈو کو دسمبر 2008 میں یورپ کے بہترین کھلاڑی جبکہ اکتوبر میں فیفا پرو فٹبالر آف دا ایئر کا اعزاز بھی دیا جا چکا ہے جبکہ وہ لوئیس فیگو کے بعد دوسرے پرتگالی کھلاڑی ہیں جنہیں فیفا فٹبالر آف دا ایئر قرار دیا گیا ہے۔