مانچسٹر یونائیٹڈ کی ٹیم انگلش پریمئر لیگ کی بھی فاتح ہے

مانچسٹر یونائیٹڈ نے بدھ کی شب فائنل میں لندن کے کلب چیلسی کو پنلٹی ککس پر شکست دی تھی۔ یہ پہلا موقع تھا کہ چیمپئنز لیگ کا فائنل دو انگلش فٹبال ٹیموں کے درمیان کھیلا گیا۔

مانچسٹر یونائیٹڈ کی فتح: تصاویر میں

روسی دارالحکومت ماسکو میں کھیلے جانے اس میچ میں مقابلہ مقررہ وقت میں ایک ایک گول سے برابر رہا تھا جس کے بعد میچ کا فیصلہ پنلٹی ککس پر ہوا جو کہ مانچسٹر یونائیٹڈ نے پانچ کے مقابلے میں چھ گول سے جیت لیا۔

میچ کا آغاز تیزی سے ہوا اور مانچسٹر یونائیٹڈ نے میچ کے چھبیسویں منٹ میں پرتگالی سٹرائیکر رونالڈو کے گول کی بدولت برتری حاصل کر لی جو پہلے ہاف کے اختتامی لمحات تک قائم رہی۔

پہلے ہاف کے اختتامی لمحات میں چیلسی کے مڈ فیلڈر فرینک لمپارڈ نےگول کر کے میچ برابر کر دیا۔ دوسرے ہاف میں چیلسی نے بہتر کھیل کا مظاہرہ کیا اور دو مواقع پر ڈروگبا اور لمپارڈ کی کک گول پوسٹ سے ٹکرا کر واپس آ گئی۔جب میچ کا مقررہ وقت ختم ہوا تو مقابلہ ایک ایک گول سے برابر تھا۔ اضافی وقت میں بھی جب کوئی ٹیم گول نہ کر سکی تو’پنلٹی شوٹ آؤٹ‘ کی بنیاد پر
میچ کا فیصلہ کیا گیا۔

	یہ رونالڈو کا اس سیزن میں بیالسیواں گول تھا

پنلٹی شوٹ آؤٹ کے دوران جب مانچسٹر یونائیٹڈ کے کرسچیانو رونالڈو کی پنلٹی کک روک لی گئی تو ایسا لگا کہ چیلسی اپنے پہلے ہی چیمپئنز لیگ فائنل میں فاتح بن جائے گی تاہم چیلسی کے کپتان جان ٹیری آخری پنلٹی کک لگاتے ہوئے پھسل گئے اور گول نہ کر سکے۔

اس کے بعد سڈن ڈیتھ مرحلہ شروع ہوا اور مانچسٹر یونائیٹڈ کے گول کیپر وین ڈی سار نے چیلسی نے نکولس انلکا کی کک روک کر اپنی ٹیم کو فاتح بنا دیا۔

مانچسٹر یونائیٹڈ کی ٹیم نو برس کے وقفے کے بعد یورپ کی چیمپئن بنی ہے۔ اس سے قبل سنہ 1999 میں مانچسٹر یونائیٹڈ نے بائرن میونخ کو شکست دے کر یہ خطاب جیتا تھا۔