دوسرے ٹی ٹوئنٹی میں انگلینڈ کی جیت

ٹی ٹوئنٹی کے تین میچوں کی سیریز میں انگلینڈ کی فتح کے بعد سیریز اب ایک ایک سے برابر ہوگئی ہے

دبئی میں پاکستان اور انگلینڈ کے درمیان دوسرے ٹی ٹوئنٹی میچ میں انگلینڈ نے پاکستان کو اڑتیس رنز سے شکست دے دی۔

انگلینڈ نے ٹاس جیت کر پہلے بیٹنگ کرنے کا فیصلہ کیا اور ایک سو پچاس رنز بنائے۔ اس نے پاکستان کو میچ جیتنے کے لیے ایک سو اکاون رنز کا ہدف دیا تاہم پاکستان کی ٹیم مقررہ بیس اووروں کے میچ کے انیسویں اوور میں ایک سو بارہ رنز بنا کر آؤٹ ہوگئی۔

کلِک تفصیلی سکور بورڈ

انگلینڈ کی جانب سے فِن نے تیس رنز کے عوض تین کھلاڑیوں کو آؤٹ کیا جبکہ براڈ اور سوان نے دو دو اور بھوپارا اور ڈیرنبیچ نے ایک ایک وکٹیں لیں۔

پاکستان کو پہلا نقصان اننگز کے آغاز میں ہی اٹھانا پڑا جب محمد حفیظ کوئی رن بنائے بغیر آؤٹ ہوگئے۔ اُس وقت پاکستان کا سکور بھی صفر تھا۔

ابھی پاکستانی ٹیم پہلے نقصان سے سنبھل بھی نہ پائی تھی کہ اسد شفیق ایک رن بنا کر کیچ آؤٹ ہوگئے۔ اُس وقت پاکستان کا مجموعی سکور دو رنز تھا۔

پاکستان کی جانب سے شاہد آفریدی نے پچیس رنز سکور کیے جبکہ عمر اکمل اور حماد اعظم نے دھواں دھار بیٹنگ کا مظاہرہ کیا اور باالترتیب انیس اور اکیس رنز بنائے۔

اس سے قبل انگلینڈ کے بلے بازوں نے سنبھل کر بیٹنگ کا آغاز کیا۔ انگلینڈ کے پہلے آؤٹ ہونے والے کھلاڑی پیٹرسن تھے جو پینتیس رنز کے مجموعی سکور پر آؤٹ ہوئے۔

انگلینڈ کی جانب سے بیرسٹو نے چھیالیس بالوں میں ستاون رنز بنائے جو سب سے زیادہ انفرادی سکور تھا۔ کریگ نے اکتیس اور پیٹرسن نے انیس رنز سکور کیے۔

پاکستان کی جانب سے سعید اجمل، محمد حفیظ اور شاہد آفریدی نے ایک ایک جبکہ عمر گل نے دو کھلاڑیوں کو آؤٹ کیا۔

ٹی ٹوئنٹی کے تین میچوں کی سیریز میں انگلینڈ کی فتح کے بعد سیریز اب ایک ایک سے برابر ہوگئی ہے۔

پاکستان اور انگلینڈ کے درمیان ٹی ٹوئنٹی سیریز کا آخری میچ ستائیس فروری کو کھیلا جائے گا۔