پاکستان کی پہلے ٹی ٹوئنٹی میں آٹھ رنز سے فتح

پہلے ٹی ٹوئنٹی میچ میں کریگ حفیظ کی گیند پر آؤٹ ہو کر پویلین واپس جا رہے ہیں

دبئی میں پہلے ٹی ٹوئنٹی میچ میں پاکستان نے انگلینڈ کو آٹھ رنز سے شکست دے دی۔

پاکستان نے پہلے بیٹنگ کرتے ہوئے چھ وکٹوں کے نقصان پر ایک سو چوالیس رنز بنائے تھے اور انگلینڈ کو جیتنے کے لیے ایک سو پینتالیس رنز کا ہدف دیا تھا۔

کلِک تفصیلی سکور بورڈ

تاہم انگلینڈ کی ٹیم بیس اوورز میں چھ وکٹیں گنوا کر ایک سو چھتیس رنز ہی بنا سکی۔

اس میچ میں انگلینڈ نے ٹاس جیت کر پاکستان کو پہلے بیٹنگ کی دعوت دی تھی۔

پاکستان کی جانب سے شعیب ملک نے چار چوکوں اور ایک چھکے کی مدد سے انتالیس رنز بنائے۔

پاکستان کے کپتان مصباح الحق نے چھبیس رنز بنائے۔

انگلینڈ کی جانب سے سوان نے تین، فِن اور جیڈ ونسٹن نے ایک ایک کھلاڑی کو آؤٹ کیا۔

انگلینڈ نے اپنی بیٹنگ کا آغاز پراعتماد طور پر کیا تاہم اس کی پہلی وکٹ اڑتالیس رنز کے سکور پر گِری جب پیٹرسن تینتیس رنز بنا کر اسد شفیق کے ہاتھوں شاہد آفریدی کی گیند پر کیچ آؤٹ ہوئے۔

انگلینڈ کی جانب سے بھوپارا نے انتالیس اور بیرسٹو نے بائیس رنز بنائے۔

عمر گل نے اٹھارہ رنز دے کر تین وکٹیں حاصل کیں جبکہ محمد حفیظ نے اٹھارہ رنز دے کر دو اور شاہد آفریدی نے ستائیس رنز دے کر ایک کھلاڑی کو آؤٹ کیا۔

ٹی ٹوئنٹی سیریز میں کلین سویپ کی صورت میں پاکستان ٹی ٹوئنٹی کی عالمی رینکنگ میں پانچ درجوں کی ترقی کے بعد دوسری پوزیشن حاصل کرسکتا ہے۔