عامر کی ذہنی تربیت کی جائے گی: ذکاء اشرف

پاکستان کرکٹ بورڈ کے چیئرمین ذ کاء اشرف کا کہنا ہے کہ اگر محمد عامر دوبارہ انٹرنیشنل کرکٹ کھیلنے کے لیے اہل قرار پاتے ہیں تو وہ انہیں پاکستانی کرکٹ ٹیم میں دیکھنا چاہیں گے۔

ذ کاء اشرف نے دبئی کرکٹ سٹیڈیم میں صحافیوں سے بات کرتے ہوئے کہا کہ آئی سی سی کے اینٹی کرپشن ٹریبونل کی جانب سے محمد عامر کی پانچ سالہ پابندی کے خلاف کھیلوں کی عالمی ثالثی عدالت میں اپیل کے فیصلے سے بھی صورتِ حال واضح ہوجائے گی۔

انہوں نے کہا کہ پاکستان کرکٹ بورڈ محمد عامر کی باقاعدہ ذہنی تربیت کرے گا۔

پاکستان کرکٹ بورڈ کے چیئر مین کے مطابق محمد عامر ایک نوجوان باصلاحیت کرکٹر ہیں، یقیناً ان سے بہت بڑی غلطی ہوئی جس کی سزا وہ بھگت رہے ہیں لیکن وہ چاہیں گے کہ مستقبل میں محمد عامر کا ٹیلنٹ مثبت انداز میں پاکستان کے کام آئے۔

ذکاء اشرف نے کہا کہ آئی سی سی ٹریبونل کی جانب سے پانچ سالہ پابندی کے دوران محمد عامر کسی بھی سطح پر کرکٹ نہیں کھیل سکتے لیکن اس عرصے میں ان کی ذہنی طور پر بحالی پر کوئی پابندی نہیں ہے۔

انہوں نے کہا کہ ان کی خواہش ہے کہ محمد عامر کی مالی مدد کے طور پر ان سے دوسرے کرکٹرز کو لیکچرز بھی دلوائے جا سکتے ہیں۔