ایڈیلیڈ ٹیسٹ، بھارت کو شکست کا سامنا

آسٹریلیا کو یہ ٹسیٹ جیتنے کے لیے چار وکٹوں کی ضرورت ہے

ایڈیلیڈ ٹیسٹ کے چوتھے دن کے کھیل کے اختتام پر بھارت نے دوسری اننگز میں چھ وکٹوں کے نقصان پر ایک سو چھیاسٹھ رنز بنا لیے۔

بھارت کو یہ میچ جیتنے کے لیے مزید تین سو چونتیس رنز کی ضرورت ہے اور دوسری اننگز میں اس کی چار وکٹیں باقی ہیں۔

کلِک میچ کا تفصیلی سکور کارڈ

تیسرے دن کے کھیل کے اختتام پرایشانت شرما دو اور پرسانتا ساہا بغیر کوئی سکور بنائے ناٹ آؤٹ تھے۔

بھارت کی جانب سے دوسری اننگز میں وریندر سہواگ نے باسٹھ اور لکشمن نے پینتیس رنز بنائے۔

بھارتی بلے باز آسٹریلوی بالروں کی تباہ کن بالنگ کا مقابلہ نہ کر سکے۔

آسٹریلیا کی جانب سے دوسری اننگز میں نیتھن لیون نے تین اور ہیرس نے دو کھلاڑیوں کو آؤٹ کیا۔

اس سے پہلے آسٹریلیا نے پانچ وکٹوں کے نقصان پر ایک سو سڑسٹھ رنز بنا کر دوسری اننگز ڈکلیئر کر دی تھی اور بھارت کو جیتنےکے لیے پانچ سو ایک رنز کا ہدف دیا تھا۔

آسٹریلیا کی جانب سے دوسری اننگز میں رکی پونٹنگ نے ناقابلِ شکست ساٹھ رنز بنائے۔

آسٹریلیا کے دوسرے نمایاں بلے باز مائیکل کلارک رہے، انہوں نے سینتیس رنز بنائے۔

ان دونوں بلے بازوں نے پہلی اننگز میں چوتھی وکٹ کے لیے تین سو چھیاسی رنز کی شراکت قائم کی تھی۔

بھارت کی جانب سے دوسری اننگز میں ایش ون نے دو، ظہیر خان، ایشانت شرما اور یادو نے ایک ایک کھلاڑی کو آؤٹ کیا۔

اس سے پہلے بھارت کی پوری ٹیم پہلی اننگز میں دو سو بہتّر رنز بنا کر آؤٹ ہو گئی تھی۔ بھارت کی جانب سے ویرات کوہلی نے ذمہ دارانہ بیٹنگ کرتے ہوئے ایک سو سولہ رنز بنائے۔

بھارت کے دوسرے نمایاں بلے باز پرسانتا ساہا رہے، انہوں نے پینتیس رنز بنائے۔

دونوں بلے بازوں نے چھٹی وکٹ کے لیے ایک سو چودہ رنز کی شراکت قائم کی۔

آسٹریلیا کی جانب سے پیٹرسڈل نے پانچ، ہلفیناس نے تین جبکہ نیتھن لیون اور ہیرس نے ایک کھلاڑی کو آؤٹ کیا۔

منگل کو شروع ہونے والے ٹیسٹ میں آسٹریلیا نے ٹاس جیت کر بیٹنگ کرنے کا فیصلہ کیا تھا۔