احمد آباد ٹیسٹ: بھارت کے 385 رنز

راہول ڈراوڈ نے بیس چوکوں اور ایک چھکے کی مدد سےاپنے کیریئر کی ستائیسویں سنچری بنائی

بھارت اور سری لنکا کے درمیان ہونے والی تین ٹیسٹ میچوں پر مشتمل سیریز کے پہلے ٹیسٹ میچ میں بھارت ٹاس جیت کر پہلے بیٹنگ کر رہا ہے۔

بھارتی شہر احمد آباد میں کھیلے جانے والے ٹیسٹ میچ کے پہلے دن کے اختتام پر بھارت نے پہلی اننگزمیں چھ کھلاڑیوں کے نقصان پر تین سو پچاسی بنائے ہیں۔ راہول ڈراوڈ ایک سو ستتر رنز اور ہربھجن سنگھ دو رنز پر ناٹ آؤٹ ہیں۔ بھارت کا آُغاز اچھا نہ تھا اور اس کے چار کھلاڑی صرف بتیس رنز بنا کر پویلین لوٹ گئے۔

اس موقع پر راہول ڈراوڈ اور یوراج سنگھ نے ذمہ دارانہ بینٹگ کا مظاہرہ کیا اور پانچویں وکٹ کی شراکت میں ایک سو پچیس رنز کا اضافہ کر کے اپنی ٹیم کا سکور ایک سو ستاون تک پہنچا دیا۔بھارت کی جانب سے گوتم گھمبیر اور ورندر سہواگ نے اننگز کا آعاز کیا۔

بھارت کو پہلا نقصان اس وقت اٹھانا پڑا جب چودہ رنز کے مجموعی سکور پر گوتم گھمبیر صرف ایک رن بنا کر ولیندگرہ چکانہ کے ہاتھوں بولڈ ہو گئے۔ستائس رنز کے مجموعی سکور پر وریندر سہوگ کو ولیندگرہ نے ایل بی ڈبلیو کردیا۔

بھارت کو اکتیس رنز پر تیسرا نقصان اٹھانا پڑا جب سچن تندولکرصرف چار رنز بنا کر ولیندگرہ کا تیسرا شکار بنے۔ بھارت کی مشکلات میں مزید اضافہ پرساد نے کر دیا جب انہوں نے بتیس رنز کے مجموعی سکور پر وی وی ایس لکشمن کو بولڈ کر دیا۔ لشکمن بغیر کوئی رن بنائے آؤٹ ہوئے۔

راہول ڈراوڈ اور یوراج سنگھ نے پانچوں وکٹ کی شراکت میں ایک سو پچیس رنز کا اضافہ کر کے اپنی ٹیم کو مشکلات سے نکالا۔ ایک سو ستاون رنز کےمجموعی سکور پر یوراج سنگھ کو مرلی دھرن نے آؤٹ کیا۔

یوراج نے ترانوے گیندوں پر تیرہ چوکوں کی مدد سے اڑسٹھ رنز بنائے۔ راہول ڈراوڈ اور بھارتی کپتان مہندر سنگھ دھونی نے مل کر اپنی ٹیم کا سکور تین سو چھ رنز تک پہنچا دیا۔ راہول ڈراوڈ نے شاندار بینٹگ کا مظاہرہ کرتے ہوئے چھیبیس چوکوں اور ایک چھکے کی مدد سے ایک سو ستتر رنز بنائے ہیں۔بھارتی کپتان منندر سنگھ دھونی نے بھی سو رنز کی دلکش اننگزز کھیلی۔