چین کی بائیس اعشاریہ چھ فیصد آبادی کو ہی انٹرنیٹ کی سہولت میسر ہے

چین میں نیٹ کی مانیٹرنگ کے سرکاری ادارے چائنا انٹرنیٹ نیٹ ورک انفارمیشن سنٹر کی طرف سے جاری کیے گئے اعداد و شمار کے مطابق ملک میں انٹرنیٹ استعمال کرنے والے افراد کی تعداد اب انتیس کروڑ اسّی لاکھ سے زائد ہو چکی ہے جبکہ صرف چھ ماہ قبل یہ تعداد پچیس کروڑ تیس لاکھ تھی۔

انٹرنیٹ صارفین کی تعداد کے حوالے سے امریکہ دوسرے نمبر پر ہے جہاں گزشتہ جون میں انٹرنیٹ صارفین کی تعداد بائیس کروڑ تیس لاکھ تھی۔

تحقیقاتی گروپ کے مطابق چین میں انٹرنیٹ استعمال کرنے والے افراد کی تعداد میں گزشتہ برس کے مقابلے میں قریباً بیالیس فیصد اضافہ ہوا ہے۔

تاہم چین میں انٹرنیٹ صارفین کی تعداد دنیا بھر میں سب سے زیادہ ہونے کے باوجود ملک کی صرف بائیس اعشاریہ چھ فیصد آبادی کو ہی انٹرنیٹ کی سہولت میسر ہے جبکہ امریکہ میں یہ شرح اکہتر فیصد ہے۔

چین میں جلد ہی ایسے ’تھرڈ جنریشن‘ فون بھی مارکیٹ میں آنے والے ہیں جنہیں انٹرنیٹ ویب سرفنگ کے لیے استعمال کیا جا سکتا ہے اور ان موبائل فونوں کے بازار میں آنے کے بعد خیال کیا جا رہا ہے کہ انٹرنیٹ صارفین کا دائرہ تیزی سے پھیلے گا۔

اس وقت چین میں موبائل فون استعمال کرنے والوں کی تعداد پچاس کروڑ سے زائد ہے۔ تاہم چین میں نیٹ استعمال کرنے والوں کی تعداد زیادہ ہونے کے باوجود ملک کی نیٹ معیشت کی ترقی کی شرح امریکہ اورجنوبی کوریا سے کم ہے۔