ہائی بلڈ پریشر سے دماغ کی نس پھٹنے اور گردے ناکام ہونے کا خطرہ بڑھ جاتا ہے

امریکہ میں کی جانے والی اس تحقیق سے معلوم ہوا کہ جن لوگوں میں یہ (ایس ٹی کے 39) جین ہوتی ہے ان کا بلڈ پریشر دوسرے لوگوں کے مقابلے میں زیادہ رہتا ہے۔ اس تحقیق میں امریکہ اور یورپ سے سینکڑوں سفید فام لوگوں کے جینیاتی خاکوں کا مطالعہ کیا گیا۔

اگر کافی عرصے تک ہائی بلڈ پریشر رہے تو اس کے خطرناک مضمرات ہوسکتے ہیں۔ اس کی وجہ سے دل کی بیماریوں، دماغ کی نس پھٹنے اور گردوں کے خراب ہوجانے کے امکانات بڑھ جاتے ہیں۔

ماہرین کا خیال ہے کہ مغربی ممالک میں رہنے والے پچیس فیصد لوگوں ہائی بلڈ پریشر کا شکار ہوتے ہیں لیکن اکثر انہیں اس کا علم نہیں ہوتا۔

یہ تحقیق امریکہ کی یونیورسٹی آف میریلینڈ میں کی گئی ہے۔ سائنسدانوں کی توجہ کا مرکز کئی درجن جین تھیں لیکن وہ اس نتیجے پر پہنچے کے بلڈ پریشر کے لیے ایس ٹی کے 39 ہی ذمہ دار ہے کیونکہ یہ ایک ایسا پروٹین تیار کرتی ہے جو بالواسطہ طور پر جسم میں نمک کی مقدار کو کنٹرول کرتا ہے۔

تحقیق سے وابستہ ایک ماہر ڈاکٹر یان پی کرسٹی چینگ کے مطابق اس دریافت سے مریضوں کو منفرد طریقہ علاج فراہم کرنے میں مدد ملے گی۔ لیکن انہوں نے کہا کہ ہائی بلڈ پریشر ایک پیچیدہ بیماری ہے جس میں اور بھی بہت سے عوامل اثر انداز ہوتے ہیں۔

لیکن میریلینڈ یونیورسٹی کے ہی ڈاکٹر ایلن شولڈینر نے کہا کہ اس دریافت سے ہمیں یہ پتہ لگانے میں مدد مل سکتی ہے کہ کن لوگوں کو بلڈ پریشر کا زیادہ خطرہ لاحق ہے لیکن یہ ہم رشتہ داروں کی بیماری کا ریکارڈ دیکھ کر بھی معلوم کر سکتے ہیں۔