جنگلات زمین کا ائر کنڈیشن نظام ہے: شہزادہ چارلس

انہوں نے ایسے نظام کو مرتب کرنے پر زور دیا جس سے غریب ممالک کو درخت گرانے سے روکنے کے لیے رقم مہیا کی جائے۔

بی بی سی کے ’ٹوڈے‘ پروگرام میں شہزادہ چارلس نے کہا کہ جنگلات زمین کا ائیر کنڈیشننگ نظام ہے۔

دنیا کے جنگلات اپنی لکڑی اور مٹی میں کاربن جمع کرتے ہیں۔ لیکن یہ درخت کاٹے جا رہے ہیں لکڑی کے لیے، غذا اور بائیو فیول کے لیے۔ ماہرین کا کہنا ہے کہ یہ کاربن ماحول میں جا ملتی ہے جس کی وجہ سے گلوبل وارمنگ ہو رہی ہے۔

موسمی تبدیلی کے معاشی پہلوؤں پر سٹرن ریویو نے دو ہزار چھ میں کہا تھا کہ جنگلات کی کٹائی سے کاربن ڈائی آکسائیڈ میں اٹھارہ فیصد اضافہ ہوتا ہے۔

شہزادہ چارلس نے بارانی جنگلات کے بارے میں کہا ’آپ یہ سوچیں کہ یہ بیس ملین ٹن نمی روزانہ ہوا میں چھوڑتے ہیں اور بڑے پیمانے پر کاربن کو بھی جذب کرتے ہیں، تو ظاہر ہے یہ بہت اہم ہیں اور بارش کا بھی سبب بنتے ہیں جس کی ہمیں اشد ضرورت ہے۔‘

مسئلہ یہ ہے کہ رین فارسٹ ان علاقوں میں ہیں جہاں پر دنیا کے غریب ترین افراد میں سے چودہ سو ملین رہتے ہیں۔ اور وہ ان جنگلات ہی کو استعمال کر کے اپنی زندگی بسر کرتے ہیں۔ ہمیں کوشش کرنی چاہیے کہ یہ جنگلات تباہ نہ ہوں لیکن ابھی تو ان جنگلات کو تباہ کرنا ہی ان لوگوں کے لیے فائدہ مند ہے۔   شہزادہ چارلس

شہزادہ چارلس کا کہنا تھا کہ ’مسئلہ یہ ہے کہ رین فارسٹ ان علاقوں میں ہیں جہاں پر دنیا کے غریب ترین افراد میں سے چودہ سو ملین رہتے ہیں۔ اور وہ ان جنگلات ہی کو استعمال کر کے اپنی زندگی بسر کرتے ہیں۔ ہمیں کوشش کرنی چاہیے کہ یہ جنگلات تباہ نہ ہوں لیکن ابھی تو ان جنگلات کو تباہ کرنا ہی ان لوگوں کے لیے فائدہ مند ہے۔‘

شہزادہ چارلس نے حکومتوں، بڑی کاروباری کمپنیوں اور عوام سے کہا ہے کہ وہ درختوں کی کٹائی بند کرنے کا مطالبہ کریں۔ انہوں نے کہا کہ یہ صحیح وقت ہے کہ کمپنیاں اس امر میں مدد کریں۔ ’درختوں کی کٹائی روکنا موسمی تبدیلی کے خلاف جنگ میں بہت مؤثر ہے۔‘

انہوں نے کہا کہ اگر درختوں کی کٹائی کو نہ روکا گیا تو خشک سالی اور فاقہ کشی میں مزید اضافہ ہو گا۔

بی بی سی کے ماحولیاتی ماہر راجر ہیرابن کا کہنا ہے کہ شہزادہ چارلس کے تاثرات کو بڑے پیمانے پر سراہا جاتا ہے۔