خلاباز جمعہ کو بین الاقوامی خلائی سٹیشن پر پہنچیں گے

ملائیشیا کے خلاباز شیخ مظفر شکور وہ پہلے مسلمان ہیں جو ماہِ رمضان میں خلاء میں گئے ہیں۔ وہ خلائی سٹیشن پر جمعہ کو پہنچیں گے اور وہاں نو دن گزاریں گے جس دوران وہ عید کا تہوار بھی اپنے ساتھی خلابازوں کے ساتھ منائیں گے۔

اس سفر پر ان کے ساتھ امریکی خاتون خلاباز پیگی وٹسن اور روسی خلانورد یوری میلنچنکو بھی گئے ہیں۔ پیگی وٹسن خلائی سٹیشن کی پہلی خاتون کمانڈر کی ذمہ داریاں سنبھالیں گی اور وہ اور ان کے ساتھی روسی خلاباز چھ ماہ تک بین الاقوامی خلائی سٹیشن پر قیام کریں گے۔

شیخ مظفر شکور کے خلائی سفر پر روانگی کے موقع پر ان کے آبائی ملک میں جوش و خروش دیکھنے آیا اور ملائیشیا کے وزیراعظم عبداللہ احمد بداوی نے کوالالمپور میں ایک خصوصی تقریب میں ایک ہزار طلباء کے ہمراہ یہ منظر دیکھا۔

ملائیشیا کے علماء نے خلاء میں دینی فرائض سرانجام دینے کے حوالے سے شیخ مظفر کے لیے خصوصی ہدایت نامہ تیار کیا ہے جس کے تحت وہ وضو کے لیے ایک گیلا تولیہ استعمال کریں گے اور بے وزنی کی کیفیت کی بناء پر نہ تو انہیں قبلہ رخ ہونا پڑے گا اور نہ رکوع و سجود کرنا ہوں گے۔اوقاتِ نماز سے متعلق مخمصہ دور کرنے کے لیے شیخ مظفر شکور قازقستان کے معیاری وقت کو مدِ نظر رکھیں گے۔