عضوِ تناسل کی بحالی کا کامیاب تجربہ

امریکہ میں یہ تجربہ خرگوشوں پر کیا گیا ہے

تجربہ گاہ میں تیار کردہ بافت یا ٹشو کی مدد سے جانوروں کے عضوِ تناسل میں تناؤ پیدا کرنے والی بافت کی مکمل تبدیلی کا تجربہ کیا گیا ہے۔

اس کامیاب تجربے سے یہ امید پیدا ہوئی ہے کہ کسی حادثے یا چوٹ لگنے کے نتیجے میں متاثر ہونے والے انسانی عضوِ تناسل کو بھی مکمل طور پر کارآمد بنایا جا سکے گا۔

یہ تجربہ خرگوشوں پر کیا گیا جنہیں امریکی ریاست شمالی کیرولائنا کی ویک فارسٹ یونیورسٹی کے سائنسدانوں کے تیار کردہ ٹشوز لگائے گئے اور اس تبدیلی کے بعد ان خرگوشوں کا جنسی عمل معمول کے مطابق رہا اور ان کے بچے بھی ہوئے۔

اس تجربے میں شریک پروفیسر انتھونی اٹالا کا کہنا ہے کہ ’یہ حقیقت ہے کہ اس سلسلے میں مزید تحقیق درکار ہے لیکن ہمارے نتائج حوصلہ افزاء ہیں اور ان سے پتہ چلتا ہے کہ عضو تناسل کی بحالی کے مریضوں کے لیے ٹیکنالوجی کی مدد لینے کے واضح امکانات موجود ہیں‘۔

ان کا کہنا ہے کہ انہیں امید ہے کہ عضوِ تناسل کے کینسر یا پھر دیگر کئی وجوہات کے نتیجے میں اس عضو کی کارکردگی میں کمی کے شکار افراد مستقبل میں اس دریافت سے فائدہ اٹھا پائیں گے۔ تاہم انہوں نے کہا کہ ’ایسے عضوِ تناسل کی بحالی جو بیماری کا شکار ہو یا اسے نقصان پہنچ چکا ہو، ایک مشکل کام ہے کیونکہ اس بافت کی ساخت اور کام بہت پیچیدہ ہے۔

.ویک فارسٹ یونیورسٹی کے سائنسداں ماضی میں تجربہ گاہ میں مکمل انسانی مثانہ بھی بنا چکے ہیں جو مریضوں کو لگایا بھی گیا ہے۔

ماضی میں کی گئی تحقیق میں سائنسدانوں نے خرگوش کے عضوِ تناسل میں تناؤ پیدا کرنے والی بافت کے کچھ حصے لگائے تھے جس کے بعد اس نے پچاس فیصد کارکردگی دکھائی تھی۔ حالیہ تجربے کے دوران سائنسدانوں نے خرگوش کے ایرکٹائل ٹشو سے ’سمُوتھ مسل سیل‘ حاصل کیے جنہیں تجربہ گاہ میں مزید طاقتور بنایا گیا اور اس کے بعد اسے دوبارہ خرگوش کے عضوِ تناسل میں لگا دیا گیا۔

برٹش ایسوسی ایشن آف یورولوجکل سرجنز کے اعزازی سیکرٹری ٹم ٹیری کا کہنا ہے کہ یہ تحقیق’حیرت انگیز‘ ہے۔ تاہم ان کا کہنا ہے کہ انسانوں پر اس تکنیک کے تجربے سے قبل ابھی بہت کام باقی ہے۔