رحم میں ہی مادری زبان

بچے مادر رحم میں ہی والدین کے تلفظ کی نقل کرنے کی کوشش کرتے ہیں

جرمنی میں سائنس دانوں کا کہنا ہے کہ بچے رحمِ مادر میں ہی اپنے والدین کی زبان کے تلفظ کو سیکھنا شروع کر دیتے ہیں اور رونے میں وہ اپنے والدین کے تلفظ کو ہی اپنانے کی کوشش کرتے ہیں۔

سائنس دانوں نے اس کے لیے ساٹھ بچوں پر ریسرچ کیا ہے جو جرمن اور فرنچ خاندانوں میں پیدا ہوئے تھے۔ پیدائش کے بعد فرنچ نسل کے بچے ذرا اونچے لہجہ میں روئے جبکہ جرمن نسل کے بچوں میں لہجہ حسب معول نیچا تھا۔

اس ریسرچ کی قیادت ورزبرگ یونیورسٹی کی کیتھلین ورمک نے کی ہے۔ ان کا کہنا ہے '' اس سٹڈی کا دلچسپ پہلو یہ ہے کہ نوزائیدہ بچے نا صرف مختلف طرح کا رو سکتے اور سر پیدا کر سکتے ہیں بلکہ وہ اس لہجہ میں سر نکالنے کو ترجیح دیتے ہیں جسے انہوں نے رحمِ مادر میں رہتے ہوئے سنا ہے۔ پرانے فرسودہ خیالات کے برعکس ہے یہ ریسرچ اس بات کا حامی ہے کہ انسانی بچے اپنی مادری زبان میں روتے ہیں ۔''

ڈاکٹر ورمک کی ٹیم نے جن بچوں پر ریسرچ کیا ہے وہ تین سے پانچ دن کے درمیان کے تھے۔

محترمہ ورمک کے مطابق '' نوزائدہ بچے اپنے والدین کی نقل کرنے پر بہت زیادہ مائل ہوتے ہیں تاکہ وہ ان کی توجہ اپنی طرف مبذول کر کے آپسی بندھن کو مزید مضبوط کرسکیں۔''

ان کا کہنا ہے کہ چونکہ بچوں میں ان کی ماں کے سروں کا خاکہ ہی ایک ایسا پہلو ہے جس کی وہ نقل کر سکیں اسی لیے شاید وہ ابتداء سے ہی ایسا کرنا شروع کردیتے ہیں۔

ریسرچ کے ذریعے یہ بات پہلے سے پتہ ہے کہ جنین حمل کے آخری تین ماہ کے دوران رحمِ مادر میں ہی باہری دنیا کی آوازوں کو یاد کرسکتے ہیں خاص طور پر موسیقی اور اور انسانی سروں کے تئیں وہ زیادہ حساس ہوتے ہیں۔

اس سے پہلے تحقیق سے پتہ چل چکا ہے کہ بچے اپنی زندگی کے بارہویں ہفتہ میں حروف علت کی آواز کو میچ کر سکتے اگر بڑے انہیں بتائیں۔

بینگور یونیورسٹی میں ریسرچ فیلو ڈیبی ملز کا کہنا ہے '' یہ بہت ہی دلچسپ ہے کیونکہ اس سے پتہ چلتا ہے کہ وہ رحمِ مادر میں ہی آوازیں نکلنے لگتے ہیں اور جس کا مطلب یہ ہوا کہ وہ سیکھنے لگتے ہیں جو غیر فطری عمل نہیں ہے۔''

ڈیبی کے مطابق یہ بھی دلچسپ بات ہے کہ ان بچوں پر ایک ماہ بعد بھی ریسرچ ہو تاکہ یہ پتہ چل سکے ان میں اپنی مادری زبان میں سروں کونکالنے کا رجحان ہے اب بھی ہے یا نہیں۔