برسٹل کی عمر ابھی اٹھارہ سال ہے

ایک رسالے میں چھپنے والی خبر کے مطابق برسٹل کے بیٹے کا نام ٹرپ ایسٹن میچل جانسٹن رکھا گیا ہے جو اتوار کو پیدا ہوا اور جس کا وزن پیدائش کے وقت سات پاونڈ اور چار آؤنس تھا۔

سارہ پیلن کے دفتر نے اس خبر پر تبصرہ کرنے سے انکار کرتے ہوئے کہا کہ یہ ان کا ذاتی معاملہ ہے۔

اس بچے کے والد کا نام لویی جانسٹن ہے جو ایک زیر تربیت ٹیکنیشن ہے۔ وہ اور برسٹل پیلن تین سال سے مل رہے تھے۔

پیلن خاندان کے ذرائع کے مطابق زچہ اور بچہ دونوں خیریت سے ہیں۔

سارہ پیلن نے اپنی غیر شادی شدہ نو عمر بیٹی کے امید سے ہونے کی خبر صدارتی انتخابات میں نائب صدر کی امیدوار نامزد کیئے جانے کے تین دن بعد عام کی تھی۔

ان کےاس اعتراف کے بعد امریکی سیاست میں ایک نئی بحث چھڑ گئی تھی لیکن باراک اوبامہ نے کہا تھا کہ یہ سارہ پیلن اور ان کی بیٹی کا ذاتی معاملہ ہے اور اسے سیاست کے دائرے سےباہر رکھا جانا چاہیے۔

سارہ پیلن اسقاط حمل کے خلاف ہیں اور انہوں نے ایک بیان میں کہا تھا کہ ان کی بیٹی اس بچےکو جنم دے گی۔

سارہ پیلن اور ان کے شوہر ٹیڈ کا کہنا ہے کہ ان کی بیٹی کو، اور وہ نوجوان جس کے بچے کو اس نے جنم دیا ہے، بہت جلد یہ احساس ہو جائے گا کہ بچے کی پرورش کرنا کتنا مشکل کام ہے اس لیے انہیں پورے خاندان کا تعاون درکار ہے۔

برسٹل پیلن اور ان کے بچے کا باپ سن دو ہزار نو میں شادی کرنے کا سوچ رہے ہیں۔