ہزاروں لوگ ایک ہی وقت میں ’مونا لیزا‘ تلاش کر رہے تھے

یورپیانا ویب سائٹ کو ہر گھنٹے ایک کروڑ لوگ دیکھ رہے تھے جو کے اندازے سے دوگنی تعداد تھی۔ ویب سائٹ پر ایک ہزار مختلف عجائب گھروں، قومی کتب خانوں میں رکھے فن مصوری کے نمونے، فِلمیں، کتابیں، نقشے اور تاریخی دستاویزات دیکھے جا سکتے تھے۔

توقع کی جا رہی کہ ویب سائٹ کو بہتر بنائے جانے کے بعد اسے دسمبر میں دوبارہ شروع کر دیا جائے گا۔ اس وقت ویب سائٹ پر ایک پیغام درج ہے کہ افتتاح کے بعد لوگوں کی بے پناہ دلچسپی کی وجہ سے ویب سائٹ بند کرنا پڑی۔

یورپی کمیشن کے ایک ترجمان نے بتایا کہ ہزاروں قاری ایک ہی وقت میں ’مونا لیزا‘ تلاش کر رہے تھے۔ انہوں نے کہا کہ لوگوں کی یورپی ثقافت میں دلچسپی ان کے اندازے سے کہیں زیادہ ثابت ہوئی۔

جمعرات کو ویب سائٹ سب سے زیادہ جرمنی اور پھر فرانس اور ہسپانیہ میں دیکھا گیا۔ یورپی ثقافتی تاریخ کے بارے میں چار فیصد لوگوں نے امریکہ سے معلومات حاصل کرنے کی کوشش کی۔