کوہ نور کو ملکہ وِکٹوریا کے تاج میں لگا دیا گیا تھا

پاکستانی وزیر اعظم نے اس وقت کے برطانوی وزیر اعظم جیمز کیلاہین کو یہ خط لکھا تھا۔

خط میں ذوالفقار علی بھٹو نے لکھا تھا کہ ’برطانیہ نے راج کے دور میں جمع کیے گئے قیمتی اشیا کو اپنے قبضے میں اب بھی رکھا ہوا ہے اور اس سے ہمارے عوام میں ثفافتی کمتری اور تاریخی محرومیت کا احساس ہے۔‘

’کوہ نور ہیرے کی بہت تاریخی اہمیت ہے۔ اسے 1849 میں پاکستان کے ثقافتی مرکز لاہور سے لندن لے جایا گیا تھا۔ کوہ نور کی برطانیہ کے لیے کوئی خاص مالی اہمیت نہیں ہے لیکن پاکستانیوں کے لیے تاریخی اور جذباتی اعتبار سے یہ بہت اہم ہے۔ اگر کوہ نور پاکستان کو واپس کردیا جائے تو اس سے برطانیہ یہ ظاہر کر سکے گا کہ وہ واقعی اپنی نو آبادیاتی تاریخ کو پیچھے چھوڑنا چاہتا ہے۔‘

	سابق وزیر اعظم ذوالفقار علی بھٹو کا کہنا تھا کہ ہیرا واپس کر کے برطانیہ اپنی نو آبادیاتی بوج ہلکہ کر سکے گا

بھٹو کے اس خط کے بعد برطانوی حکومت نے سنجیدگی سے کوہ نور کی مِلکیت کے معاملے پر غور کیا تھا۔

ان دستاویزات سے پتہ چلتا ہے کہ حکومت نے سرکاری افسروں کو ہدایت دی تھی کہ وہ اس بارے میں قانونی پوزیشن وضع کریں۔ وکلاء سے رجوع کیا گیا، تاریخی ذرائع کی جانچ کی گئی اور مختلف سفارتخانوں سے اس سلسلے میں رابطے کیے گئے۔ اس ہیرے کی ملکیت پر ایران، افغانستان اور بھارت بھی دعوے دار ہو سکتے تھے لہذا ان سے کہا گیا کہ وہ اس کہانی کو ختم کرنے کی پوری کوششیں کریں۔

برطانیہ نے یہ ہیرا ایک امن معاہدے کے ذریعے حاصل کیا تھا اور اسے لندن بھیج دیا تھا۔ اس ہیرے کو ملکہ وکٹوریا کے شاہی تاج میں لگادیا گیا تھا اور یوں یہ شاہی زیوارت یعنی ’کراؤن جیولز‘ کا حصہ بن گیا۔

دستاویزات سے حکومت کی تحقیقات پر وزارت خارجہ کے ایک افسر سی او ہنٹ کی تنقید کا بھی پتہ چلتا ہے۔ اس افسر کو یہ تمام تحقیق غیر ضروری لگی اور انہوں نے لکھا ہے کہ ’ہمیں یہ سب کرنے کی ضرورت نہیں ہے۔ تلخ حقائق یہ ہیں کہ کوہ نور ہیرا ہمارے پاس ہے چاہے اس کی قانونی حیثیت کوئی بھی ہو اور ہم یہ واضح کر چکے ہیں کہ اسے ہم اپنے پاس ہی رکھیں گے۔‘

برطانوی وزیر اعظم نے بھی بھٹو صاحب کو بتا دیا کہ برطانیہ انہیں کوہ نور واپس لاہور نہیں بھیجے گا۔