Sunday, 22 August, 2004, 13:10 GMT 18:10 PST

عراقی تیل: پیداوار معمول پر آ گئی

تیرہ دن کے وقفے کے بعد عراق میں ماہرین تیل کی پیداوار واپس معمول کی سطح پر لے آئے ہیں۔

ساؤتھ آئیل کمپنی کے ایک افسر نے کہا ہے کہ ملک کی بڑی پائپ لائنیں اب معمول کے مطابق کام کر رہی ہیں اور تیل کے پیداوار پھر سے ایک اعشاریہ نو ملین بیرل یومیہ ہو گئی ہے۔

بصرہ کی بڑی پائپ لائن تازہ ترین تشدد کے واقعات اور مقتدیٰ الصدر کے حامیوں کی طرف سے تیل کے کنوؤں پر حملوں کی دھمکیوں کے بعد بند کر دی گئی تھی۔

عراق کا نوے فی صد تیل بصرہ کی پائپ لائن کے ذریعے برآمد ہوتا ہے اور اسی بندش کی وجہ سے پچھلے کچھ دنوں میں عالمی منڈی میں تیل کی قیمتیں انتہا کو پہنچ گئی تھیں۔