نثار کھوکھر بی بی سی ردو ڈاٹ کام، سکھر

بینظیر کی صاحبزادیاں آصفہ (دائیں) اور بختاور والد آصف زرداری کے ساتھ

بختاور کی آواز میں ریکارڈ کیا گیا ایک ریپ سانگ (جدید موسیقی کا ایک انداز) اب یو ٹیوب پر بھی پوسٹ کیا گیا ہے۔ پانچ منٹ کے اس نغمے پر بینظیر بھٹو کی تصاویر اور وڈیو کلپس دی گئی ہیں۔

اٹھارہ سالہ بختاور ایڈنبرا یونیورسٹی کی طالبہ ہیں۔ انہیں شاعری اور گائیکی سے گہرا لگاؤ ہے۔ کہا جا رہا ہے کہ انہوں نے بظاہر اپنی والدہ کی ہمت افزائی کے بعد شوقیہ نغمے گانا شروع کیے تھے۔

انہوں نے اپنی والدہ کو خراج پیش کرتے ہوئے کہا ہے کہ ’آپ ذہین اور خوبصورت تھیں، آپ نے ہر کام ایک انداز میں کیا‘۔ انہوں نے ستائیس دسمبر کے واقعے کے بارے میں کہا ہےکہ آپ کو کنپٹی کےقریب گولی ماری گئی، چون سال کی عمر میں ہم سےالگ ہوئیں، تین بچے پسماندگان میں چھوڑے۔ پوری قوم آپ کےبغیر نا امید ہے اور آپ ان سب کی دل کی دھڑکنوں میں موجود ہیں۔

بختاور بینظیر بھٹو کے بچوں میں بیس سالہ بلاول بھٹو کے بعد دوسرے نمبر پر ہیں۔ وہ موسیقی میں شروع سے دلچسپی لیتی رہی ہیں۔ کہا جا رہا ہے کہ انہوں نے اپنی والدہ کی وطن واپسی سے قبل امریکا میں ایک صحافی دوست کی معرفت گریمی ایوارڈ یافتہ میوزک پروڈیوسر اور ریپر پف ڈیڈی سے ملاقات کی خواہش کا اظہار کیا تھا۔ مگر یہ ملاقات نہ ہوسکی تھی۔

یو ٹیوب پر موجود ہے  بختاور کی شاعری کا بعض سندھی اخبارات نے ترجمہ بھی شائع کیا تھا مگر ان کی آواز پہلی مرتبہ یو ٹیوب کی معرفت سنی جا رہی

بختاور کی شاعری کا بعض سندھی اخبارات نے ترجمہ بھی شائع کیا تھا مگر ان کی آواز پہلی مرتبہ یو ٹیوب کی معرفت سنی جا رہی۔ بینظیر بھٹو کے بعض کارکنوں اور عقیدت مندوں نے بختاور کے ریپ سانگ کی سی ڈیز بنوانا شروع کی ہیں۔

دوسری جانب پاکستان پیپلز پارٹی کے ترجمان فرحت اللہ بابر نے تصدیق کی ہے کہ یو ٹیوب پر موجود نغمے کی شاعری اور آواز بختاور کی ہے۔ انہوں نے اسلام آباد سے فون پر بتایا ہے کہ یہ ایک غمزدہ بیٹی کا اپنی جرات مند والدہ کو خراج عقیدت ہے جو پاکستان کی سرکاری ٹی وی نیٹ ورک پر بھی جاری کیا گیا ہے۔

فرحت اللہ بابر نے کہا ہے کہ بختاور کے نغمے کی سی ڈیز وغیرہ تقسیم کرنے کا پروگرام ان کی جماعت نے فی الوقت نہیں بنایا ہے۔

ان کا کہنا تھا کہ چند ماہ قبل فیس بک ویب سائٹ پر ان کی جماعت کے جواں سال چئرمین بلاول بھٹو زرداری کا جعلی اکاؤنٹ بنا یا گیا تھا جو بعد ختم کیا گیا ہے۔