ذوالفقار علی بی بی سی، اردو ڈاٹ کام ، مظفرآباد

	پاکستان کے زیرِ انتظام کشمیر کے علاقے میں زلزلے سے بیشتر سڑکیں ناقابلِ استعمال ہو گئی تھیں

پولیس کا کہنا ہے کہ یہ مسافر وین باغ شہر سے مظفرآباد آرہی تھی کہ غازی آباد کے مقام پر موڑ کاٹتے ہوئے پھسل گئی اور پہاڑی سے لڑھک کر ایک کلومیڑ نیچے گرگئی۔

اس حادثے کے نتیجے پولیس کے مطابق ڈرائیور اور ایک خاتون سمیت سات افراد ہلاک ہوگئے جبکہ ایک شخص شدید زخمی ہوگیا ہے۔

پولیس کا کہنا ہے کہ اس وین میں ڈرائیور سمیت کل آٹھ افراد سوار تھے۔

پاکستان کے زیر انتظام کے میدانی علاقوں میں گذشتہ تین روز سے وقفے وقفے سے بارشیں ہورہی ہے جبکہ پہاڑوں پر برف باری کا سلسلہ جاری ہے۔

بارشوں کے باعث تودے گرنے کی وجہ سے وادی نیلم کو مظفرآباد سے ملانے والی سڑک آمد و رفت کے لیے بند ہوگئی ہے۔

اس کے علاوہ پہاڑی علاقوں کو جانے والی کئی رابطہ سڑکیں تودے گرنے یا برف باری کے باعث بند ہوگئی ہیں۔

آٹھ اکتوبر سن دو ہزار پانچ کے زلزلے کے نتیجے میں کشمیر کے اس خطے کے متاثر ہونے والے علاقوں میں لگ بھگ تمام سڑکیں تباہ ہوگئی تھیں یا ان کو زبردست نقصان پہنچا۔

ان علاقوں میں کم و بیش تمام سڑکوں کو قابل استعمال تو بنا لیا گیا ہے لیکن یہ نہیں کہا جاسکتا ہے کہ انہیں تعمیر کیا گیا ہے۔
زلزلے کے تین سال بعد بھی ان سڑکوں کی حالت خستہ ہے۔

پولیس کا کہنا ہے کہ زلزلے سے متاثرہ علاقوں میں سڑکوں کی حالت خراب ہونے کی وجہ سے ٹریفک حادثات میں اضافہ ہوا ہے اور یہ کہ لوگوں کی سفر کرنے میں مشکلات کا سامنا ہے اور وہ بے یقینی اور خوف کی کیفیت میں سفر کرتے ہیں۔

سڑکوں کی تعمیر کا کام شروع نہ ہوسکنے یا تعمیر میں تاخیر اور سست روی کے باعث متاثرہ علاقوں کے لوگوں میں وزیرِ اعظم سردار عتیق کی حکومت اور زلزلے سے متعلق پاکستان کے تعمیر نو اور بحالی کے ادارے کے خلاف غم و غصہ پایا جاتا ہے۔