ریاض سہیل بی بی سی اردو ڈاٹ کام، کراچی

	مختلف جماعتوں نےقربانی کی کھالیں حاصل کرنے کے لیے اشتہارات بھی دیے ہیں

سندھ محکمہ داخلہ کے اعلامیے میں کہا گیا ہے کہ عیدالاضحیٰ پر مختلف مذہبی جماعتیں، سماجی تنظیمیں اور رفاعی ادارے پورے شہر میں قربانی کی کھالیں جمع کرتے ہیں اور کوشش کرتے ہیں کہ زیادہ سے زیادہ کھالیں جمع کریں۔

’اس صورتحال میں کھالیں جمع کرنے والوں کے درمیان سخت مقابلے کی کیفیت پیدا ہوجاتی ہے جو بعض اوقات تصادم کی شکل اختیار کرجاتی ہے اور بڑے پیمانے پر نقض امن کا خطرہ پیدا ہوجاتا ہے۔‘

محکمہ داخلہ کا کہنا ہے کھالیں جمع کرنے کے لیے پیشگی اجازت نامہ حاصل کرنا لازمی ہوگا، صرف ان جماعتوں، تنظیموں اور اداروں کو کھالیں جمع کرنے کی اجازت دی جائے گی جو رجسٹرڈ ہیں اور ضابطہ اخلاق پر دستخط کریں گے۔

کھالیں جمع کرنے کے کیمپ لگانے، گاڑیوں پر لاوڈ اسپیکر لگا کر یا مساجد اور دفاتر سے کسی قسم کے اعلانات اور گھر گھر جاکر زبردستی کھالیں جمع کرنے پر بھی پابندی ہوگی۔

کھالیں جمع کرنے والے اداروں تنظیموں کو ہدایت کی گئی ہے کہ جب ان کے کارکن کھالیں ایک جگہ سے دوسری جگہ منتقل کریں تو ان کے پاس قومی شناختی کارڈ، ادارے کا کارڈ اور محکمہ داخلہ کی جانب سے جاری کیے گئے اجازت نامے کی نقل موجود ہونی چاہئیے، بصورت دیگر قانون نافذ کرنے والے اداروں کو یہ حق ہوگا کہ یہ کھالیں ضبط کرلیں۔

عید کے تین روز تک کسی بھی قسم کا اسلحہ ، ڈنڈے، لاٹھی یا سلاخیں لیکر چلنے پر پابندی ہوگی۔ اس پابندی کا اطلاق لائسنس یافتہ اسلحے پر بھی ہوگا۔

اعلامیے کے مطابق اس حکم کے نفاذ کے لیے قانون والے ادارے جگہ جگہ موٹر سائیکلوں اور گاڑیوں کو روک کر گاڑیاں چیک کریں گے اور تلاشی لیں گے۔

کراچی میں امن و امان کی انتظامات کی لیے پولیس اور رینجرز نے مختلف علاقوں کا فلیگ مارچ بھی کیا ہے۔